بلوچ یکجھتی کمیٹی ءِ سروک ڈاکٹر ماہ رنگ ءَ وتی شنگ کرتگیں درشانے ءَ گوشتگ: بژنی گپے کہ بلوچستان ءَ گوستگیں بیست ءُ چار ادارانی تہ ءَ چار بیگواھیں مردمانی ژانگولیں لاش دزکپتگ اَنت۔
آئی ءَ گوشتگ کہ گوستگیں روچ ءَ چہ آواران ءَ دو بیگواھیں مردم پکیر جان ءُ ایسا ءِ لاش دزکپتگ۔ پکیرجان ءَ پاکستانی لشکر ءَ 26 ستمبر 2024 ءَ چہ آئی گس ءَ آوار جنگ ءَ پد بیگواہ کرتگ ءُ ایسا ءَ 17 پروری 2023 ءَ آوار جتگ بیگواہ کرتگ۔
ڈاکٹر ماہ رنگ ءَ گوشتگ کہ مرچی ھزدار ءِ ھند زھری ءَ دگہ دو مردم آبدھسین ء گلام ھسین ءُ مستی ھان ء گوھر ھان جاہ منند زھری ءِ لاش دزکپتگ۔ دوئیں 2017 ءَ پاکستانی لشکر ءَ آوار جتگ بیگواہ کرتگ اَنت۔
آئی ءَ گوشتگ کہ لھتیں روچ پیش چہ گْوادر ءَ بیگواھیں بشیر اھمد ءِ ژانگولیں لاش ھم دزکپتگ، چہ ایشی ءَ پیش لشکر ءَ آئی دزگیری وت منّ اتگ۔ ھمے وڑ ءَ لھتیں روچ پیش چہ تربت ءَ اسرار نامیں ورنایے ءِ ژانگولیں لاش دزکپتگ۔
بلوچ یکجھتی کمیٹی ءِ سروک ءَ گوشتگ کہ مردمی ھکانی گلاں اے ٹوھیں جیڑہ ءِ سر ءَ زوت دلگوش گْور کنگ لوٹ ایت۔
ڈاکٹر ماہ رنگ ءَ گوشتگ کہ پاکستانی لشکر زور بیگواھیں مردماں کشگ ءُ آیانی ژانگولیں لاشاں چگل دیگ ءَ اِنت۔
