گوادر: بلوچ یکجھتی کمیٹی ءِ نیمگ ءَ بلوچ راجی مچیءَ شھید بوتگیں پہ بلوچ پسگانی شرپءَ راجی سوگندے اڈ دیگ بوتگ۔
بلوچ یکجھتی کمیٹی ءِ سروک ڈاکٹر ماہ رنگ ءَ بلوچ راجی مچی نندانک ءَ ساڑی ئیں مردم سوگند داتگ اَنتءُ گوشتگ کہ منءَ بلوچ راجی مچیءَ شھید بوتگیں بلوچ پُسگانی سوگند اِنت کہ من پہ بلوچ راج ءِ یکجاہ ءُ یکمشت کنگءَ جھد کن آں۔ من بلوچءَ چہ دَمگ، ٹک، زبان، مذھب ءُ ایدگہ کلیں پَرک ءُ پیراں کشگءِ جھد کن آں، ءُ بلوچءَ تھنا بلوچ جوڈ کنگ ءِ جھد ءَ ھوار باں۔
آئی ءَ گوشتگ کہ من ءَ بلوچ راجی مچی ءَ شھید بوتگیں بلوچ پسگانی سوگند اِنت کہ ریاستءِ ھما ادارہ (بزانکہ ایف سی، آرمی ءُ چیریں ادارہ) کہ بلوچ راجی مچی ءِ میانءَ بلوچ پسگانی شھید کنگءَ ھوار بوتگ انت من چہ اے بلوچ دژمن ادارھاں دزکش باں ءُ ھرچ ھما بلوچ کہ آھانی سیادی گوں اے ادارھاں بوت من گوں آھاں چاگردی سیادیءَ ھلاس کن آں۔
آئی ءَ دیمتر ءَ گوشتگ کہ من ءَ بلوچ راجی مچی ءَ شھید بوتگیں بلوچ پسگانی سوگند اِنت کہ ھرچ ھما بلوچ کہ پاکستانءِ دلار جوڑ بوت ءُ وتی بلوچ پسگانی گرگ ءُ کُشگءَ ھوار بوت (توری آ دلار چہ منی جندءِ ھونءَ بوت)من گوں آئیءَ وتی درستیں سیادیاں ھلاس کن آں۔
آئی ءَ گوشتگ کہ من ءَ بلوچ راجی مچی ءَ شھید بوتگیں بلوچ پسگانی سوگند اِنت کہ من بلوچ ڈیھ ءَ پاکستان ءِ ھرچ وڑیں زلم ءُ زوراکی ءُ بلوچ چُکچینی ءِ بگیریءَ وتی وسءَ جھد کن آں۔
آئی ءَ گڈی ءَ گوشتگ من ءَ بلوچ راجی مچی ءَ شھید بوتگیں بلوچ پسگانی سوگند اِنت کہ من پاکستانءِ دستءَ شھید بوتگیں بلوچ پسگانی ھونءِ سودا ءَ نہ جن آں، کدی اوں وتی راجی شھیداں کم شرپ نہ کن آں ءُ ھرچ کسے کہ اے کارءِ بھر بوت من آئیءَ سرجمءَ ایر جن آں۔ “راجی شھیدانی مُز راجی وشیں بانداتءِ منزل اِنت۔
