بلوچ یکجھتی کمیٹی ءِ سروک ڈاکٹر ماہ رنگ ماں چاگردی رسانکدر ایکس ءَ گوادر ءَ بلوچ راجی مچی ءِ باروا نبشتگ کہ راجی مُچی چہ سیاسی ءَ گیش بلوچ، بلوچی ءُ مردمگری ءِ درد ءُ جنجالاں سریچیں تورناکی ءِ درشانے۔
آئی ءَ گوشتگ کہ شھزانتیں بلوچ راج گوستگیں بیست ءُ پنچ سال اِنت مئے ھزارانی کچ ءَ آزیز بلوچ ورنا ءُ کماش پاکستانی لشکر ءِ چیریں آزارجاھاں سکائیں گرم ءُ سارت ءِ جاوراں سسائی آزارانی دیمپان اَنت ءُ مرگ ءُ زند ءِ میان ءَ زندگیں لاش اَنت ءُ زند گوازینگ ءَ اَنت۔ آ ھمے اوست ءَ دار اَنت کہ درد وار پما توار چست بہ کن اَنت۔ چے ما یک روچے گوادر ءِ پر مھر ءُ پر پر ارزیشتیں گرمیں گوات ءِ تہ ءَ یکجاہ بہ بہ ایں ءُ پہ وتی آزیزاں ترند ءُ توپانیں توارے جست کرت کن ایں؟
ڈاکٹر ماہ رنگ ءَ گوشتگ کہ چے ما پہ وتی کودک ءُ چورھیں زھگاں دردانی مارشت ءَ یکجاہ بہ ایں ءُ دیم ءَ وتی زھگاں چہ چورہ بوگ ءَ پھریز ات نہ کن ایں؟ چے ما دیمتر ءَ وتی مات ءُ گھارانی ارس ءُ اُپاراں دیست ءُ اوپار کنگءُ زندگی ءِ گوازینیں ءُ ھمے گوش ایں کہ ما زندگیں راجے ایں؟ چے اے بے تواری، اے ترس، لگوری وت مئے پیشانی سر ءَ سیاھیں ٹکے نہ بیت؟َ
آئی ءَ گوشتگ کہ ما پیسر ءَ گوشتگ ءُ مرچی تچکی ءَ گوش ایں کہ راجی مچی سیاسی کارے، بلے سیاسی مول ءُ سیاسی کار ءَ گیش بلوچ راجی مچی بلوچی ءُ مردمگری ءِ درد ءُ جنجالا ں سریچیں آزارانی پدرائی اِنت کہ گوستگیں 75 سال اِنت ریاست گوں جتائیں پندل ءُ وڑ ءُ پیماں بلوچ چکچینی کنگ ءُ پیداک اِنتءُ نوں بلوچ چکچینی ءَ ریاست ءَگیش ترند کنگ ءُ دراجکش کنگ ءِ سوڑگ کرتگ۔
ڈاکٹر ماہ رنگ ءَ گوشتگ کہ اگاں ما بے توار بوت ایں آھوکیں وھداں بلکیں ما یک مردمے ءِ پیم ءَ زند بوت کن ایں بلے بلوچ راج ءِ نام ءُ نشان نہ بیت۔
آئی ءَ گوشتگ کہ پمیشکا سیاست، پارٹی، گل چہ کینگ، بھر ءُ بانگ ءَ در بہ کپ اَنت ءُ تیوک ءَ بلوچ ءِ بستار ءَ آ کج ءَ اَنت، چون اَنت، وتی راجی زمہ واریاں بہ زانت ءُ 28 جولائی ءَگوادر ءَ بلوچ راجی مچی ءَ ھوار بہ بنتءُ بلوچ راج ءِ یکجاہ کنگ ءَ وتی کرد ءَ پیلو بہ کن اَنت۔
