ھزدار: گریشگ ءَزوگریں پاکستانی لشکر سی ٹی ڈی ءَ کوچو ءَ گسانی سر ءَ ارش کرتگ چہ تیرگواری ءُ لٹ شاپ ءَ جنیناں ھوار باز مردم ٹپی بوتگ اَنت۔ مردماں سی ٹی ڈی ءِ زوراکیانی بگیری ءَ گری ءَ سی پیک دگ بند کرتگ۔
اھوالکار ءِ رد ءَ بیگواہ کنگ بوتگیں مردما نی نام شاہ جانء سلیم، گوھر دین ء ھیرجان، مھم جان ء لال بکش، میار ء لال بکش، مھمد آرپ ء ابدارھمان ءُ منیر ءسبرو اِنت کہ گریشگ کوچو ءِ جاہ منند اَنت۔ سی ٹی ڈی ءِ تیرگواری ءَ زور بیگواھیں منیر ءِ مات ءُ پت ءَ ھوار باز مردم ٹپی اِنت۔
پاکستانی لشکر ءَ بیڑ برگ ءِ میان ءَ دو پرپٹ ءُ دو لک زر ءَ ھوار ھشت موبائل ءُ گسانی آدگہ گرانھادیں سامان ھم برتگ اَنت۔ لشکر ءَڈگانی سر ءِ سولر سسٹم ھم تیرگواری کرتگ ءُ تباہ کرتگ اَنت۔
سی ٹی ڈی ءِ زوراکیانی بگیری ءَ گریشگ ءِ ھند گری ءَ زھرشانی ءَ بی وائی سی ءِ باسک ءُ نودربرانی ھواری ءَ مردماں بازیں کچے ءَ بھر زرتگ۔
زھرشانی کنوکیں مردمانی گوشگ اِنت دانکہ مئے زور بیگواھیں مردم یل کنگ ءُ گوں سانمندیں کھولاں انساپ کنگ نہ بوتگ ما وتی زھرشانی ءَ برجاہ دار ایں۔
