شال : پہ زور بیگواھیں مردمانی پدجنگ ءَ شدکشیں زھرشانی گدان ءَ 5478 روچ سرجم بوتگ۔ پنچ شمبے ءِ روچ ءَ نیشنل پارٹی ءِ سروک مھمد رپیک کوسہ، رھیم بکش ءُ شاہ ساھب ءَ ھوار آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءِ جاور پہ میان استمانی ادارہ ،اکوام متھدہ ءُ آدگہ مردمی ھکانی ٹاپار جنوکانی جار ءُ راھبنداں جستے ودی کن اَنت۔ مردمی ھکانی راھبند ءِمنگ ءُ چہ ایشی ءَپد انچیں جار پرینگ ءُ کرار دا د پیش کنگ ءَ ابید گوستگیں شش دھک اِنت کہ بلوچ چکچینی بوگ ءَ اِنت ءُ بلوچ چہ وتی ھکاں زبھر اَنت، روچ رھمانی بلوچ پسگانی آوارجنی ءَ بس نہ کرتگ۔
آئی ءَ گوشتگ کہ پاکستان ءِ نیمگ ءَ مردمی ھک لگتمال بوگ ءَ اَنت بلے اے درگت ءَ اکوام متھدہ ، یورپی یونینءُ سرجمیں جھان ءِ مردمی ھکانی ادارھانی بےتواری پاکستان ءَگیشتر کمک کنت۔ پاکستان ءِ گون ءَ مردمی ھکانی باروا سلاہ گرگ بژنی گپے۔ اکوام متھدہ ءُ امریکہ ءِ ادارھاں مدام وتی گزارشاں گوں پاکستان ءَ مردمی ھکانی باروا گپ جنگ ءِ کول کرتگ بلے آیانی کرد تیوک ءَ درشانانی تہ ءَ گندگ بیت۔
ماما کدیر گوشتگ کہ ھیومن رائٹس واچ ایمنسٹی انٹر نیشنل ءِ گزارشانی پارست ءَ بلوچستان ءَ پاکستان ءِ ناشریں کارپد پدر کنگ بوتگ اَنت۔ پاکستان ءِ دست ءَ ھزارانی کچ ءَ بلوچ پسگانی آوارجنی ءُ شھیدی تچکیں منانک اَنت۔ وھدے کہ ستمبر 2013 ءَ اکوام متھدہ ءِ ورکنگ گروپ ءَ بلوچستان ءَ زورگریں لشکر ءِ چکچینی کاروائیانی گپ ھم جتگ اتگ اَت۔
