بلوچ وومن پورم ءِسروک ڈاکٹر شلی بلوچ ءَ وتی شنگ کرتگیں درشانےءَ گوشتگ کہ ڈاکٹر نسیم بلوچ ءِ پت مھمد بکش ساجدی، آئی ناکو رپیک بلوچ ءُ نھیم ساجدی 2 پروری 2026 ءَ پاکستانی پوج ءَ آوار جتگ اَنت۔ اے ویل ءَ سے ماہ گوستگ بلے داں روچ ء مرچی ھم سرکاری ادارھاں نہ آیانی دزگیری من اتگ ءُ نہ آیانی بابت ءَ سرپدی داتگ۔
آئیءَ گوشتگ کہ سے مردمانی امر ھم مزن اِنت ھپتاد سال ءِ نزیک اِنت، آ نادراھی ءِ آماچ اَنت۔ انچو وھد اِنت کہ بیگواہ اَنت، چہ الاج نہ بوگ ءَ پہ آیانی جانسلامتی ءِ بابت ءَ ترس اِنت۔
ڈاکٹر شلی بلوچ ءَ گوشتگ کہ ڈاکٹر نسیم بلوچ، بلوچ نیشنل موومنٹ ءِ چیئرمین اِنت اےوھد ءَ آئی پت ءُ ناکو بیگواہ اَنت۔ اےمچی سزا ءِ درچ اِنت کہ پہ سیاسی توار ءِ دارگ ءَ آئی کھول نشانگ کنگ بوگ ءَ اِنت۔ اے کار کانود ءُ انسانی ھکانی راھبند ءِ بگیری اِنت۔
آئی ءَ گوشتگ کہ ما ھمے لوٹ ءَ کن ایں کہ اے سےئیں مردم زوت یل کنگ بہ بنت۔ آ زوت آمیدگس ءَ پیش کنگ بہ بنت، پہ آیانی بابتءَ سرپدی دیگ بہ بیت ءُ پہ آیانی سلامتی ءَ دلجمی دیگ بہ بیت۔آ کانود ءِ رد ءَ زوت الاج کنگ بہ بنت۔
ڈاکٹر شلی بلوچ ءَ گوں میان استمانی انسانی ھکانی ادارہ ، اکوام متھدہ ءَ لوٹ کرتگ کہ آ اے جیڑہ ءِ سر ءَ دلگوش گور بہ کن اَنت ءُ پٹ ءُ پول بہ کن اںت۔ ما ھمے لوٹءَ کن ایں کہ آ بلوچستانءَ انسانی ھکانی لگتمالیانی سر ءَ پاکستانءَ جست بہ کنت۔
بنشون: درشان اکس: رسانکدر
