تربت: چہ کولواھی بازار ءَ پاکستانی لشکر ءِ دست ءَ زور بیگواہ کنگ بوتگیں ھیات ء جما ءِ مات ءَ وتی درشانے ءَ سی ٹی ڈی ءِ ایپ آئی آر رد کرتگ ءُ گوشتگ کہ منی زھگ گس ءَ واب بوتگ کہ آ چہ گس ءَ آوار جنگ ءُ بیگواہ کنگ بوتگ، نوں سی ٹی ڈی ءَ آئی ءِ سر ءَ دروگیں ایپ آئی آر نبشتگ ءُ آئی سر ءَ بمب ءُ دگہ بھتام جنگ ءَ اِنت۔
آئی ءَ گوشتگ کہ ھیات جما چنچو روچ اِنت چہ ڈینگی ءِ تپ ءَ ڈن ءَ در نہ یتکگ، ھمے شپ ءَ کہ آ زور بیگواہ کنگ بوتگ آ تپیگ بوتگ۔
ھیات ءِ مات ءَ گوں آمیدگس ءَ آئی گندگ ءِ لوٹ کرتگ ءُ گوشتگ کہ من ءَھمے ترس اِنت سی ٹی ڈی منی زھگ ءَ چو بالاچ مولابکش ءِ وڑ ءَ تاوان مہ دنت من پمیشکا لوٹ آں کہ وتی زھگ ءَ بہ گنداں ءُ آئی سلامتی ءَ سرپد بباں۔
آئی ءَ گوشتگ کہ منی زھگ شپ ءِ تھاری ءَ چہ واب ءَ آوارجنگ ءُ بیگواہ کنگ بوتگ ءُ رند ءَ آئی سر ءَ بھتام جنگ بژنی گپے۔ منی زھگ چہ ڈینگی ءِ سوب ءَ نادراہ بوتگ من پہ آئی نادراھی ءَسکا تکانسر آں۔
ھیات ءِ مات ءَ گوں کیچ ءِدمگدار ءُ آمیدگس ءَ لوٹ کرتگ کہ آ پہ ھیات جما ءِ آجوئی ءُ گوں آئی ءَ گند ءُ نند کنگ ءَ منی گون ءَ کمک بہ کن اَنت۔
یات بہ بہ اِت کہ ھیات جما دو روچ پیش چہ گس ءَ آوار جنگ بوتگ ءُ نوربرے۔ آئی لسبیلہ زانشتجاہ ءَ جیولوجی ءَ گریجویٹ کرتگ۔
