چہ بلوچ نیشنل موومنٹ ( بی این ایم ) ءِ نیمگ ءَ شھید ڈاکٹر منان ءُ ھمراھانی شھیدی روچ ءَ نیادے برجم دارگ بیتگ ، ماں اے نیاد ءَ بی این ایم آواران ھنکین ءِ باسکاں بھر زرتگ۔ نیاد ءَ بی این ایم ءِ کستریں کمک سرکماش استاد بابل لتیپ ، بنجاھی پتر ءِ باسک چیپ اسلم ، آواران ھنکین ءِ کمک کماش تلار ناز ءُ زبیر ءَ تْران کرتگ۔
زانگ بہ بیت 31 جنوری 2016 ءَ مستونگ ءِ کلی دتو ءَ پاکستانی پوج ءِ بیڑ ءَ شھید ڈاکٹر منان گوں وتی ھمراہ بابو نوروز ، ھنیپ ، اشرپ ءُ ساجد ءَ شھید بوتگ اَنت۔ شھید ڈاکٹر منان بی این ایم ءِ سرکارگشاد اَت۔
تْرانکاراں وتی گپانی تہ ءَ گْوشتگ شھید ڈاکٹر منان راھشونے ءَ ابید راجی تبیبے اَت۔ آئی ءَ بلوچستان ءِ ھمک ھلک ءُ میتگ زانتگ اَنت ءُ ناگیگیں جاورانی تہ ءَ ھم پارٹی ءِ مگیم کنگ ءَ شپ ءُ روچ نہ چار اِتگ۔ کسے ءَ کجام ھم جاھے توار بہ جتیں آئی ءَ پہ گل ءِ کاراں وت ءَ سر کرتگ۔
آیاں شھید ڈاکٹر منان ءِ سیاسی سنچ ءُ بودشتانی سر ءَ گپ جنان ءَ گْوشتگ شھید ڈاکٹر منان ءَ سنگتانی کار مدام شرگداری نگاہ ءَ چار اِتگ اَنت۔ اگاں جاھے نزوری یے دیست تچک ءَ گْوشتگ ئِے۔ آئی ءِ نز ءَ شرگداری پہ راجداری ءِ آمید کنگ ءَ المی اَت ،نے کہ آ شرگداری ءَ کینگ سرپد اَت۔ آئی ءَ ھمے لوٹ اِت کہ مئے نزوریانی سان مئے گل ءُ زْرمبشت ءِ سر ءَ مہ کپ اَنت۔
’’ شھید ڈاکٹر منان ءِ شھیدی ءَ مزنیں جاھے ھورک اِنت بلے چہ آئی ءِ دیمونیاں گل مگیم ءُ توانمند ھم بیتگ۔ آئی ءَ ھمے گواچن کرت کہ مستریں توان نامدار بیگ نہ اِنت بلکیں گوں وتی مول ءَ وپادار بیگ اِنت۔ ‘‘
تْرانکاراں دیمتر ءَ گْوشتگ ڈاکٹر منان ءَ گوں وانگ ءُ زانگ ءُ کتاباں مزنیں دوستی یے ھست اَت۔ شھید منان جان ءَ سنگتاں مدام کتاب وانگ ءِ سکین دات ءُ گوشت کہ گوں کتاباں سنگتی بہ کن اِت کتاب شمئے دیمروئی ءِ مانزمان اَنت۔ آئی ءَ سنگتاں مدام کتاب وانگ ءِ سکین دات ءُ وت ھم کتاب ئِے ونت۔آ گوں سیاسی کاراں مدام دزگٹ اَت۔ ھال ئِے گوش داشت ءُ وتی گْور ءَ یاداشت ءِ نبشتہ کرتگ اَنت داں بلوچستان ، دمگ ءُ جھان ءِ جاوراں شریں وڑے سرپد ءُ آگاہ بہ بیت۔
آیاں گْوشتگ کہ ڈاکٹر منان چہ اگدہ دار بیگ ءَ پیش ھم راھشونے ءِ بستار ءَ کار ءَ اَت۔ آ بلوچ راج ءِ پرزوریں توارے اَت ۔ آئی ءَ بلوچ نیشنل موومنٹ ( بی این ایم ) ءِ تلو ءِ سر ءَ بلوچ راج یکجاہ کرتگ۔ آئی ءَ زانت ، سسا ءُ سکین دات داں پاکستان ءِ زوراکی ءُ چیردستی ءِ بگیری ءَ گھگیری بہ کنت۔ پاکستان ءَ آ پمیشکا نشانگ کرت داں آئی ءِ سیاسی کارانی دیم ءَ بہ گپت۔
آیاں وتی گپانی تہ ءَ درائینتگ ، پاکستانی سرکار بلکیں ھمے سرپد بیت کہ آ راجی سراں شھید کنت ءُ بلوچ ءِ زْرمبشت ءِ اوشت ایت یا آسر بیت ، چوش نہ اِنت بلکیں شھیدانی دیمونی بلوچ ءِ پدریچ ءَ گیشتر ، آگاہ ءُ سوگہ کن اَنت ءُ بلوچ روچے ناں روچے وتی آزادی ءَ الم گیت۔
بنشون: درشان. اکس: بی این ایم 
