زرمبش ءِ نیمگ ءَ مرگاپ ءِ شھیدانی یات ءَ برجم داشتگیں مراگش ءَ زرمبش بلوچی ءِ شونکار سرباز وپا ءِ جست ءِ پسو ءَ بلوچ راجی زرمبشت (بی این ایم ) ءِ بنجاھی سرکماش ڈاکٹر نسیم ءِ تران۔
جست: واجہ بی این ایم ءِ بانی سروک شھید واجہ گلام مھمد ءَ ھوار آدگہ بنجاھی سروکانی شھیدی ءُ بیگواھی ءَ پد بی این ایم گوں کجام شونداتاں (پالیسیاں) کار کنگ ءَ اِنت؟
چئیرمین ڈاکٹر نسیم: مرگاپ ءِ شھید ءُ آدگہ درسیں شھیداں سھریں دْروت ، دْروتے پہ ھما گار ءُ بیگواھیں بلوچ پسگاں کہ سالانی سال پاکستانی آزار جاھاں سکی ءُ سوری اوپار کنگ ءَ اَنت۔ مرگاپ ءِ شھیدانی سالروچ ءِ درگت ءَ اگاں شھید واجہ گلام مھمد بہ بیت ، شھید لالا منیر بہ بیت ، شھید واجہ شیر مھمد بہ بیت یا چہ آیاں پد چینچو بلوچ پسگ ءِ لاش ماں مرگاپ ءَ دور دیگ بوتگ ، چہ اِیشی ءَ پد مرگاپ یک شھیدانی جاگھے ءُ شھیدانی پلسپھے ءِ نام ءَ زانگ بیت۔
بی این ایم ھما شھیدانی پلسپہ ، کار ءُ لیکہ ءَ زورگ ءُ دیم ءَ روگ ءِ اھد ءُ پیمان ، چہ اولی روچ ءَ آئی مول ءُ مراد بلوچستان ءِ آجوئی بوتگ۔ ھما شھیدانی لوٹ ءُ واھگ بوتگ ھمائی ءَ زورگ ءُ دیم ءَ روگ ءَ اِنت۔ اے میان ءَ بی این ایم ، بی ایس او ءُ آدگہ آجوئی لوٹوکیں گلانی بگیری ءَ پاکستان ءِ یک بلاھیں پرشت ءُ پروشے(کریک ڈاونے) بوتگ کہ آئی ءَ ورنا ، کماش ، پیریں ، کسان ءُ مزن ، اسپیت ریش ھچ کس نہ زانتگ ءُ گپتگ ءُ براں کرتگ اَنت بندیگجاھاں یا وتی کشت ءُ کوشی شوندات (پالیسی) ءِ رد ءَ کشتگ ءُ چگل داتگ اَنت یا انگت ءَ گار ءُ بیگواہ اَنت۔ ایشانی تہ ءَ یک مزنیں لڑے بی این ایم ءِ راھشون ءُ باسکانی اِنت کہ مرچی ما مرگاپ ءِ شھیدانی نام ءَ گراں ، گڑا بی این ایم ءِ سروک ھم گون اَنت۔
بی این ایم ءِ بنجاھی کابینہ ءِ باسک ، بنجاھی پتر ءِ باسک ، لس باسک ھوار اَنت۔ بلوچ لس مھلوک گون اِنت ، اے کچ سکا باز اِنت، ھمے وڑ ءَ گار ءُ بیگواھیں مردمانی تہ ءَ بی این ایم ءِ نامی ئیں راھشون ءُ کارکنوک(ایکٹیویسٹ) گون اَنت، آ ڈاکٹر دین جان بہ بیت ، آ سنگت گپور بہ بیت ، آ سنگت رمزان بہ بیت ، یک بلاھیں لڑے کہ بی این ایم ءُ آدگہ آجوئی لوٹوکیں گلاں دیمونی ءِ پلسپہ ءِ بنیاد ءَ داتگ اَنت۔ ایشانی تہ ءَ لس مھلوک ءِ بے کساس کربانی، مھنت ، آیانی ھون ءِ ریچگ ، آیانی ھید ءِ ریچگ ، آیانی در پہ در بوگ ، آیانی لوگ ءُ جاگاہ ، میتگانی میتگ سوچگ ءُ تباہ کنگ بوگ اے سکا بلاھیں کربانی اَنت کہ بلوچ راج دیگ ءَ اِنت۔
اے درسیں چیزاں زورگریں پاکستان یک پدی پسو (ری ایکشنے) ءَ پہ جنز (موومنٹ) ءِ دارگ ءَ کنگ ءَ اِنت، آ جنز پہ بلوچستان ءِ آجوئی ءَ اِنت۔ اے آجوئی ءِ جھد ءِ دیم ءَ برگ ءَ بی این ایم ءِ یک بلاھیں کردے ، شھید واجہ گلام مھمد ءِ بلاھیں کردے کہ آئی بنیادی راہ گیشینتگ ءُ کاروان ءَ دیم ءَ برگ ءَ بوتگ ءُ آ وتی کاروان ءِ دیم ءَ برگ ءَ یا آجوئی ءِ پلسپہ ءِ سر ءَ تر ءُ تاب یا گند ءُ گدار (موبلائزیشن) ءِ کنگ ءِ کار ءَ سوبین بوتگ۔ اے کار ءَ بی این ایم سوبین بوتگ ، بلوچ ءِ گدان گدان ءَ ، بلوچستان ءِ کنڈ کنڈ ءَ آجوئی ءِ گپ سر اِنت۔ مرچی اگاں کسے کئیت کارے کنت، ھر پیمیں جھدے کنت ، اے امل ءُ پروسز بلوچ آجوئی لوٹوکیں گلاں بی این ایم ءُ بی این ایم ءِ واجہ گلام مھمد ءِ وڑیں سروکاں اے پروسز گْوازینتگ ءُ نوں ما دیمتری گام ءَ اِیں۔ انچوش کہ پاکستان ءِ گپ ءَ اَت اِیں ، گڑا بی این ایم ءِ سر ءَ یک بے جاریں پابندی ءُ یک بلاھیں کریک ڈاؤنے ءَ پد ھما اسٹریٹجی بی این ایم ءَ گراؤنڈ ءَ بدل کرتگ۔ ھما کار ھما وھد ءُ جاورانی ھساب ءَ بوتگ اَنت ، آیان ءَ نوں دگہ رنگے ءَ دیم ءَ برگ ءَ اِنت۔
اود ءَ بی این ایم ءِ لیکہ ساڑی اِنت ، اود ءَ بی این ایم ءِ مردم ، باسک ءُ دوزواہ یک مزنیں کچے ءَ ساڑی اَنت۔ آ دگہ گپے کہ انچو ما اسٹریٹجی ءِ گپ ءَ کنگ ءَ اِیں ، وھد ءُ جاورانی ھساب ءَ چو پیسری پدرائیں وڑے ءَ گوں بی این ایم ءِ نام ءَ ، گوں بی این ایم ءِ ممبرشپ ءَ یک پالیسی یے ءِ پارست ءَ دیم ءَ نیا اَنت کہ آ ھما پیسری وڑ ءَ جنگ ءُ برگ ، ارزانی ءَ دژمن ءِ دست ءَ بیا اَنت، آ اسٹریٹجی مرچی مارا گون نہ اِنت۔
پد ءَ دو سے چیز اَنت مارا چارگ لوٹ اَنت ، لیکہ کہ آئی بنیاد راجدوستی اِنت۔ آئی ءِ بنیاد ءَ بی این ایم جوڑ اِنت ، آجوئی لوٹ اِیت آ یک ابدی (پرمننٹ) راھے ، آ لیکھے ، آئی ءَ تو ھچ وڑ ءَ مٹ کرت نہ کن ئے ءُ ترا گون اِنت۔ پد ءَ اسٹریٹجی کئیت، اسٹریٹجی ھما دیرگندیں پالیسی بنت، وڑ ءُ پیم بنت، آ داں مزنیں وھدے ءَ یا داں گڈسر ءَ ترا گوں بنت، پد ءَ ٹیکٹس بنت، ٹیکٹساں تو ھمک وھد ءَ مٹ کرت کن ئے، تو اسٹیٹجی ءَ مٹ کرت کن ئے۔ زندگیں راج ، زندگیں ءُ شریں پارٹی آ وتی لیکہ ءِ دیم ءَ برگ ءَ وتی منزل ءَ رسگ ءَ وتی شوربندیاں مٹ کن اَنت۔ نوک نوکیں اسٹریٹجی وھد ءُ جاورانی ھساب ءَ جوڑ کن اَنت۔
ٹیکٹسانی مٹ کنگ، بلے اے ٹیکٹس مٹ کنگ ءَ ، اے اسٹریٹجی ءَ را ، اے پالیسان ءَ کسے اے گْوشت نہ کنت کہ بی این ایم یا پلاں پارٹی پلاں جاہ ءَ ساڑی اِنت یا پلاں جاہ ءَ نیست اِنت۔ اگاں ما 2008 ءُ 2005 ءِ لوٹانی پارست ءَ دیم ءَ برو اِیں گڑا تو ھما کاراں ھما وڑ ءَ لوٹگ ءَ ئے کہ دیم ءَ برو اَنت ، موبالائزیشن دیم ءَ بروت گڑا تو پد ءَ یک مزنیں کریک ڈاونے ءَ داوت دیگ ءَ ئے کہ گڑا آ شوربندی ءُ کشکسازی (اسٹریٹجی) مرچی کار نہ کنت۔ پرچا کہ من اولسر ءَ گْوشت ھما موبلائزیشن ءِ کار کہ آجوئی ءِ نام ءَ بوتگ ، راجدوستی سیاست ءِ نام ءَ بوتگ ، آ کار (پروسز ) گوں بی این ایم ءِ لیڈرشپ ءَ گوں وتی کربانی ءُ مھنت ءَ آ پروسز گْوازینتگ۔
2013 ءَ بی این ایم برجاھیں دْروشم ءَ آھگ ءُ دیم ءَ روگ دانکہ 2014 ءُ 2015 ءَ داں ھما وھد ءَ درکار بوتگ ، بی این ایم ھما پالیسی ءِ پارست ءَ گراؤنڈ ءَ نشتگ ءُ گپ دیم ءَ برتگ ءُ بلوچستان ءِ آجوئی ءِ سلوگن دیم ءَ برتگ۔ مرچی آ پروسز ءِ زورت نہ اِنت کہ مردمان ءَ بہ گوش ئے تو آجوئی لوٹگ ءَ ئے نوں مردم درس ءَ وت سرپد اَنت ، پرچا کہ ھمے کار بی این ایم ءَ کرتگ ءُ پیش داشتگ۔ آ یک ونڈے(پیزے) بوتگ مردمانی سرپد کنگ ءِ آ تو گْوازینتگ ءُ نوں دگہ یک پیزے ءَ ئے ، اے پیز ءَ تو کجام وڑ ءَ کار کن ئے چونیں کارمان (ٹیکٹس) ، چونیں شوربندی(اسٹریٹجی) زور ئے آ تئی سر ءَ اِنت۔
تئی مردم چون ءُ کجام وڑ ءَ آ جاہ ءَ وتی گپ ءَ دیم ءَ برت کن اَنت ، ترا سرپد (موبلائز) کرت کن اَنت ، ترا جتائیں پلیٹ پارم دات کن اَنت ، اے تئی سر ءَ اِنت تئی ھمک کار ءُ شوربندی اسٹریٹجی ءِ سر ءَ اِنت۔ بی این ایم اے نہ اِنت کہ بی این ایم ءِ مردم ، باسک ءُ ایکٹیویسٹ کربانی دیگ ءَ چہ پشت ءُ دیم بنت۔ اے وڑ نہ اِنت ، ایش اِنت کہ زندگ بوگ ءُ کار کنگ کار ءِ دیم ءَ برگ وت یک کربانی یے ، اگاں تو اے کار ءَ یکشل ءَ دیم ءَ برگ لوٹ ئے گڑا ترا مدام ساڑی بوگی اِنت۔ داں دیر ءَ ساڑی بوگی اِنت ، ھمے پالیسی، ھمے گپ ءُ ٹیکٹس اَنت کہ بی این ایم ءِ لیڈرشپ ءَ مار اِتگ گْوستگیں ھشت ءُ دہ سالاں ھمے پالیسی ءِ سر ءَ دیم ءَ روان اِنت دانکہ مرچی ءَ روگ ءَ اِنت دیمتر ءَ جاور مٹ بنت، تئی پالیسی ءُ ٹیکٹس مٹ بوت کن اَنت پہ وتی آجوئی ءِ لیکہ ءِ دیم ءَ برگ ءَ ، بلے مرچی ئیں جاوراں ترا چے درکار اِنت تو ھمایاں پیلو کنگ ءَ ئے۔
مرچی ھمے کارانی وڑ ءُ پیم ءِ برورد اِنت کہ بی این ایم شریں گلے ءِ دْروشم ءَ گراؤنڈ ءَ ساڑی اِنت کہ وتی کاراں ھم دیم ءَ برگ ءَ اِنت ءُ وتی کاز ءَ ھم دیم ءَ برگ ءَ اِنت ، آ وڑ ءَ دژمن ءِ چم ءَ ھم آھگ ءَ نہ اِنت۔ ایشانی تہ ءَ یک مزنیں لڑے کہ چہ آ اود ءِ جاوراں دلسیاہ بوتگ یا پارٹی ءِ پالیسی بوتگ اَنت کہ بازیں مردم شتگ ءُ ڈائسپورہ ءِ بھر بوتگ اَنت ءُ درانڈیھ اَنت ، بلے اود ءَ ھم گوں وتی کار ءَ بی این ایم ءِ لیکہ ءَ بندوک اَنت۔ ایشانی تہ ءَ یک مزنیں کچے ھما اَنت کہ ڈیھ ءَ ھم بی این ایم ءِ باسک بوتگ اَنت کہ آ ھچبر نہ دژمن ءِ دیم ءَ نزور بوتگ اَنت ءُ نہ وتی کار اِش یل داتگ۔
ڈائسپورہ ءِ تہ ءَ دگہ یک بلاھیں لس مردمانی کہ کچے آ چہ جاوراں دلسیاہ بوتگ ءُ ڈیھ اِش یل داتگ اتکگ اَنت ، اد ءَ بی این ایم ءَ گوں تپاک اِش کرتگ ءُ بی این ایم ءَ ھوار بوتگ اَنت۔ بی ایم آیانی ھیلکاری ءَ کنت ءُ کنگ ءَ اِنت ، آ ھم یک شریں کردے پیلو کنگ ءَ اَنت۔ ڈائسپورہ ءِ تہ ءَ ھمود ءَ مردمانی موبلائز کنگ ءُ بلوچستان ءِ بارو ءَ سرپدی دیگ اے یک پروسزے کہ بی این ایم ءِ سنگتاں دیم ءَ برتگ ، دگہ بازیں پورمانی تہ ءَ روگ ءُ گپ کنگ سرپدی دیگ اے یک پروسزے دیم ءَ برگ بوتگ۔ زانشتجاہ ءُ آدگہ وانگجاھانی تہ ءَ بی این ایم ءِ سنگتاں پروگرام ھم کرتگ ، دیم ءَ ھم انچیں پروگرام کن اَنت۔ اود ءَ لس مردم ، نودربر ءُ ورنایان ءَ سرپدی دیگ اے پروسز اَنت کہ دیم ءَ شتگ اَنت۔ مردم گندگ ءَ اَنت کہ جتائیں ڈیھانی پارلیمنٹانی باسک ھم بلوچستان ءِ سر ءَ گپ جنگ ءَ اَنت۔ آ اے ھم گندگ ءَ اَنت کہ ھمیشانی گوں بی این ایم ءُ کاراں سنگتانی جھداں اے مردم بلوچ ءِ کاز ءَ کمک کنگ ءَ اَنت۔ وتی ڈیھانی پارلیمنٹ ءِ تہ ءَ ھم گپ جن اَنت ، تئی لوٹ ءِ پد ءَ کاینت پہ تو ھم گپ جن اَنت۔ اے بی این ایم ءِ لھتیں سوبمندی اَنت کہ آ گراؤنڈ ءَ ساڑی اِنت ءُ وتی کار ءَ دیم ءَ برگ ءَ اِنت، آ مردم ڈن ءَ ڈائسپورہ ءِ دْروشم ءَ ساڑی اِنت۔
اے جھان ءِ ھمک زرمبشت ءِ تہ ءَ بوت ءَ کہ آ چہ اود ءِ جنگ ءُ جاوراں بلاھیں مھلوکے سانمند بیت اِنت آ وتی ڈیھاں یل کن اَنت ءُ درانڈیھ بنت۔ ڈائسپورہ ءِ بھر بنت ، ءُ ھمود ءَ وتی کاراں دیم ءَ بر اَنت۔ اے پہ بلوچ زرمبشت ءَ نوکیں گپے نہ اِنت، بلوچ ھما جھان ءِ تہ ءَ وتی جنز ءُ کاراں دیم ءَ برگ ءَ اِنت۔ انچوش کہ آدگہ راجانی جنز بوتگ اَنت ، آیان ءَ ڈائسپورہ ھست اِنت ، آ ھم سانمند بوتگ اَنت ، ڈائسپورہ اِش جوڑ کرتگ ءُ ڈائسپورہ ءِ تہ ءَ کار اِش کرتگ، بی این ایم ھم ھمے کار ءَ کنگ ءَ اِنت۔
