شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5405 روچ سرجم بوتگ۔ آدینگ ءِ روچ ءَ چہ شال ءَ زور بیگواھیں گل مھمد مری ءُ مٹھا مری ءِ کھول آتکگ ءُ زھرشانی گدان ءَ نشتگ اَنت۔
چہ زھرشانی گدان ءَ زور بیگواھیں گل مھمد مری ءِ مات ءَ وتی تامربندے ءَ گوں سرکار ءَ لوٹ کرتگ ءُ گوشتگ کہ من زھگ ءَ زوت آجو بہ کن اِت۔ اگاں منی زھگ ءَ چونیں میارباری یے کرتگ گڑا آمیدگس ءَ پیش کنگ بہ بیت۔
آئی ءَ گوشتگ کہ کسانیں زھگانی وشی، رمزان ءِ نیکیں ماہ ءُ پہ آئید ءِ شادمانیاں پچار اِت منی زھگ ءَ آجو بہ کن اِت۔ من چماں کور ءُ پداں لنگ آں سکا لاچار بوتگ آں چہ وتی گس ءَ درکپتگ ءُ زھرشانی گدان ءَ آتکگاں منی پریاد گوش دارگ بہ بنت۔
زور بیگواھیں مٹھا ھان ءِ کھول ءِ گوشگ اِنت کہ مئے گس ءِ والینوک ءَ آئید ءِ درگت ءَ آجو بہ کن اِت۔کسانیں زھگ راھچار اَنت کہ مئے پت کدی کیت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ما اے آئید ءَ چو مدامی ئیں وڑ ءَ گوں زور بیگواھیں مردمانی کھولانی ھمراھی ءَ شال ءُ کراچی ءَ زھرشانی کن ایں ءُ چہ بلوچستان ءَ ھزارانی کچ ءَ بیگواھیں مردمانی آجوئی ءَ توار چست کن ایں۔
