شال: پہ زور بیگواھیں مردمانی پد جنگ ءَ شال پریس کلب ءِ دیم ءَ برجاھیں وی بی ایم پی ءِ زھرشانی گدان ءَ 5345 روچ سرجم بوتگ۔ یک شمبے ءِ روچ ءَ جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ ریاست ءِ زوراکی یکشل ءَ برجاہ اَنت، ھمک روچ مردم درکانودی آوار جنگ ءُ بیگواہ کنگ بوگ ءَ اَنت۔ مردم درکانودی کشگ ءُ آیاں دروگیں میڑ ءِ نام دیگ بوگ ءَ اَنت۔
آئی ءَ گوشتگ کہ بلوچستان یا پاکستان ءِ گچینکاری ءُ سرکارانی مٹ بوگ ءَ بلوچستان ءِ بارو ءَ ریاست ءِ زوراکیانی شونداتانی تہ ءَ ھچ گھتری نہ بوتگ۔ ریاست بلوچستان ءَ چو کالونی ءِ وڑ ءَ چارگ ءَ اِنت۔ پروری ءِ دہ روچانی تہ ءَ درزنانی کچ ءَ مردم زور بیگواہ کنگ بوتگ اَنت۔
ماما کدیر گوشتگ کہ بلوچستان ءَ ماتانی بچ چہ سالاں ریاستی لشکر ءِ دست ءَ زور بیگواہ کنگ بوتگ اَنت، اے بارو ءَ وتگڑیں راجدوست ءُ پارلیمنٹ دوستانی تہ ءَ ھچ پرک نیست۔ مرچی کہ آیانی ووٹ گار اَنت زھرشانی کنگ ءُ گریوگ ءَ اَنت۔ بلوچ راج آیانی کارپداں شر سرپد اِنت کہ اے راج ءِ درد وار نہ اَنت وتی نپانی رند ءَ کپتگ اَنت۔
آئی ءَ گوشتگ کہ مئے کِر ءَ زوریں بیگواھی ءَ ھواریں انچیں مردمانی بازیں منانک ھست کہ ھما مردم ریاست ءِ اسمبلیاں ایم پی اے ءُ ایم این اے بوگ ءَ اَنت۔ ریاست ءَ بلوچستان ءَ چک چکچینی ءِ تیز کنگ ءَ ھما مردمان ءَ واک داتگ کہ گیشتر مردم پکش اِنت ءُ زوراکی ءِ پارست ءَ مردماں بدار اِت۔
