گوادر: بلوچ یکجھتی کمیٹی ءِ سروک ڈاکٹر ماہ رنگ ءَ چہ بلوچ یکجھتی کمیٹی ءِ کمکی گدان ءَ وتی تامربندے شنگ کرتگ ءُ گوشتگ کہ مرچی دھمی روچ اِنت گوادر ءِ مردم چہ ریاستی ھار ءِ سوب ءَ بے گس اَنت۔ ھزارانی کچ ءَ مردمانی گس کپتگ اَنت ءُ ھزارانی کچ ءَ مردم بے روازگار اَنت۔ ھمامردم پچیں آزمان ءَ بے گس ءَ کپتگ اَنت، آیان ءَ اے وھد ءَ مئے وتی راج ءِ کمک درکار اِنت۔
آئی ءَ گوشتگ کہ بلوچ یکجھتی کمیٹی ءَ پہ ھارآماچیں مردمانی کمک ءَ گوادر ءَ یک بنجاھی گدانے جتگ۔ چہ ایشی ءَ اَبید سرجمیں بلوچستان ءَ بلوچ یکجھتی کمیٹی ءِ کمکاراں کمکی گدان جتگ اَنت۔ من گوں شما درساں ھمے دزبندی ءَ کناں کہ کج ءَ گدان جنگ بوتگ اَنت وتی کمکاں سر بہ کن اِت۔
ڈاکٹر ماہ رنگ ءَگوشتگ کہ مرچی دہ روچ اِنت کہ گوادر ءِمردمانی گسانی تہءَ آپ اوشتاتگ۔ پہ آپ ءِ درکنگ ءَ مشین، وردن، راشن ءُ سامان درکار اِنت۔ باز مردم ھست کہ آ سرکاری جاگھانی تہ ءَ کپتگ اَنت آیاں َ گس نیست، پہ ھمے چیزاں من گوں شما دزبندی کناں کہ وتی مردمانی کمک ءَ بہ کن اِت ءُ بلوچ یکجھتی کمیٹی ءِ ھمراھداری ءَ بہ کن اِت۔
آئی ءَ گوشتگ کہ کسے کج ءَ گدان جنگ لوٹ ایت مئے گون ءَ راھوت بہ کنت۔ دری ڈیھانی مردم ھست اَنت گوادر ءِ ھار آماچیں مردماں کمک کنگ لوٹ اَنت مئے گون ءَ رھوت بہ کن اَنت۔ اے سکیں وھد ءَ گوادر ءِ مردم مارا وتی راج ءَ چارگ ءَ اَنت۔ ما وتی گوادر ءِ مردماں وت کمک بہ کن ایں سرکار ءُ سرکاری ادارہ آیانی بستار ھمیش اِنت آیانی سر ءَ بیسہ کنگ نہ بیت وتی مردمانی وت کمک ءَ بہ کن اِت۔
