گوادر:گوستگیں روچانی توپانیں ھوارانی سوب ءَ ھارآماچیں مردماں سرکار ءِ نیمگ ءَ کمک نہ کنگ ءِ بگیری ءَ مرچی پد ءَ زھرشانی ءَ پدی زر بندکرتگ۔ زھرشانی ءَ زھگ ءُ جنین ھم گوں بوتگ اَنت۔
زھرشانی کنوکیں مردمانی گوشگ اِنت کہ ھور ءُ ھاراں تیوگیں گوادر ءِ شھر مل اِتگ ، مردم اے سارتی ءَ آپانی تہ ءَ بزگ اَنت ءُ واکداراں سدے پر نیست۔ اگاں ھرکس کیت پہ وتی پیش دارگ ءَ لھتے اکس کش ایت بلے مردماں ءَ انگت ءَ ھچ وڑیں کمک کنگ نہ بوتگ۔
آیانی گوشگ اِنت کہ مارا چار روچ اِنت ما ھمے پریات ءَکنگ ءَ ایں بیا اِت گسانی تہ ءِ آپ ءَ بہ کش اِت یکے ءِ گوشاں مورے ھم نہ وارت۔ مردماں نہ نان پہ ورگ ءَ ھست ءُ نہ پہ وپسگ ءَ جاہ ھست، مردم سکا جنجالانی دیمپان اَنت۔
آیانی گوشگ اِنت کہ چہ گسانی تہ ءَ جم بوتگیں آپانی سوب ءَ مردمانی گس کپگ ءَ اَنت، آدگہ جاھاں ابید انگت ءَ نادراجاہ ءِ دیم ءِ آپ ھم کشگ نہ بوتگ۔ اگاں مردم ٹپی بوتگیں مردمے نادراھجاہ ءِ ببارت گڑا سکا جنجالانی دیمپان بیت۔ گوادر ءِ کمک دمگدارپریس کانپریس کنگ ءَ اِنت کہ گوادر ءِ جاور شر اَنت بلے انگت ءَ پہ مردمانی ھال پرسی ءَ نہ یتک، مردمانی کمک ءُ گوادر ءِ دیمروئی ھشکیں دروگ اَنت۔
آیاں گوشتگ دانکہ گوادر واکدار پہ مئے کمک ءَ گامگیج نہ زور اَنت ءُ کار بندات کنگ مہ بیت ما وتی زھرشانی ءَ ھلاس نہ کن ایں۔
یات بہ بہ اِت کہ زی ھم گوادر ءِ ھار آماچیں مردماں زھرشانی ءَ دگ بند کرتگ اَت۔
