گوادر: مرچی دو روچ اِنت کہ دڑامب ءَ پاکستانی لشکر ءِ لشکرکشی برجاہ اِنت۔
اھوالکار ءِ رد ءَ مرچی دو روچ اِنت کہ گوادر ءِ نیمگ ءَ دڑامب ءِ کوہ ءَ پاکستانی لشکر ءِ لشکرکشی برجاہ اِنت۔ لشکر ءِ چاریگی بالگرد ءُ ڈرون تر ءُ گرد کنگ ءَ اَنت ءُ لشکر پیادگ ءَ کوہ ءِ تہ ءَ پُتِرتگ۔
یات بہ بہ اِت کہ دو روچ پیش بلوچستان آجوئی سنگر ( بی ایل ایپ ) ءِ سرمچاراں دڑامب ءَ اکاڈہ ڈیم ءِ راہ ءِ سر ءَ زورگریں لشکر نشانگ کُرتگ کہ چہ ایشی ءَ ھپت کارمند مُرتگ۔
اے اُرش ءِ زمہ واری بی ایل ایپ ءِ جارکش میجر گھرام ءَ منّ اِتگ ءُ گوشتگ کہ سرمچاراں گوادر ءَ دڑامب ءِ کوھی دمگ ءَ زورگریں پاکستانی لشکر ءِ کاروان ءِ سر ءَ گوں نوکین ءُ ٹوھیں سلاھاں اُرش کُرتگ۔ اُرش ءَ دژمن ءِ ھپت کارمند مُرتگ ءُ دو ٹپی بیتگ۔ایشی ءَ گاڑی ءُ پرپٹ ءَ باز تاوان بیتگ۔
بنشون ءِ رد ءَ چہ بی ایل ایپ ءِ سوبمندیں اُرش ءَ پد زورگریں پاکستانی لشکر ءِ لشکرکشی برجاہ اِنت۔ چہ ایشی پیش ھم زورگریں پاکستانی لشکر ءَ ترندیں اُرشانی پژدر ءَ لشکرکشی کرتگ ءُ لس مردم زوراکیانی نشانگ کرتگ اَنت۔
اے بارو ءَ مئے گیشیں جست ءُ پرس برجاہ اِنت۔
