گوادر: گوستگیں روچاں ترندیں ھور ءُ ھاراں تیوگیں گوادر شھر مل اتگ، باز گس لمب اتگ ءُ بازیں مردم ٹپی بوتگ اَنت۔ انگت ءَ سرکار ءَ سانمندیں مردم کمک نہ کرتگ اَنت۔ مردماں زھرشانی ءَ سید زھور شاہ ھاشمی چاراہ ءَ دگ بند کرتگ۔
زھرشانی کنوکیں مردمانی گوشگ اِنت کہ دو رند ءَ تریں ھوراں گورتگ تیوگیں شھر آپ ءَ بڈ اِتگ بلے سرکار ءِ کمکی ٹولی انگت ءَ گندگ نہ بیت۔ ما پمیشکا لاچار بوتگیں ءُ زھرشانی کنگ ءَ ایں۔ اے وھد ءَ بازیں مردم وتی گسانی تہ ءَ بند اَنت ءُ درکپت نہ کن اَنت۔
آیاں گوشتگ کہ ما وتی کمک ءَ وت داں دو روچاں باز جھد کرتگ بلے مئے گون ءَ آپ کم بوگ ءَ نہ اِنت، مارا پہ آپ ءِ کشگ ءَ آپی پمپ درکار اِنت بلے مارا ھمے پمپ ھم دیگ نہ بوتگ۔ آپ ءِ پمپ دمگدار ءِ کارگس ءَ ایر اِنت اگاں آ مارا ھمیشی بدے اَنت ما وتی گسانی تہ ءَ اوشتاتگیں آپ ءَ کش ایں۔
آیانی گوشگ اِنت کہ سے روچ ءِ گوزگ ءَ پد واکدارانی نیمگ ءَ انگت ءَ ھچ وڑیں کمک کنگ نہ بوتگ ءُ مردم سکا جنجالانی دیمپان اَنت۔ مارا بس واکدارانی نیمگ ءَ دروگیں دلبڈی دیگ بوتگ ءُ دلجمیں گامگیج زورگ ءَ نہ اَنت۔ دانکہ سرکار ءِ نیمگ ءَ کار بندات کنگ نہ بوتگ ما وتی زھرشانی ءَ ھلاس نہ کن ایں۔
یات بہ بہ اِت کہ سرکار ءِ نیمگ ءَ ھار آماچیں مردمانی کمک نہ کنگ ءِ بگیری ءَ زی ءُ پیری ھم زھرشانی کنگ بوتگ، مرچی سیمی روچ اِنت کہ مردم زھرشانی کنگ ءَ اَنت۔
