بلوچ وومن پورم ءِ جارکش ءَ وتی شنگ کرتگیں درشان ءَ جنینانی میان استمانی روچ ءِ درگت ءَ ھاران ءَ دیوانے برجم دارگ ءِ جار جتگ ءُ گوشتگ کہ جھان ءِ گوستانک ءَ راجانی جوڑشت ءُ جھد ءَ جنیناں جوانیں کردے پیلو کنگ ءَ اَنت۔ بلوچ راجی جھد ءَ بلوچ جنینانی کرد، زمہ واری، لیکھی ءُ زانشتی کار شونی ءِ دیم ءَ آرگ ءَ جنینانی میان استمانی روچ ءِ درگت ءَ ھاران ءَ دیوانے برجم دار ایں۔
بنجاھی جارکش ءَ وتی درشان ءَ گوشتگ کہ گوستانکی پارست ءَ بلوچ چاگرد ءَ بلوچ جنینانی بستار گوں مردیناں یک اِنت، بلوچ جنین ھمک بھرگ ءَ جوانیں کردے پیلو کنگ ءَ اَنت۔ بلے بلوچ چاگرد ءُ دود ءُ ربیدگ ھلاس کنگ بوتگ اَنت نوک آبادیں نزامے جوڑ کنگ بوتگ، ایشی تہ ءَ بلوچ جنینانی کرد داں ھدے ءَ دارگ بوتگ۔ بلوچ جنینانی سیاسی، چاگردی، مالی ءُ زانشتی پڑا دور دارگ ءِ جھد کنگ بوگ ءَ اِنت دانکہ راجی پرزءِ پیلو کنگءَ بلوچ جنینانی کردارداں ھدے ءَ دارگ بہ بیت ءُ بلوچ جنین راجی جوڑشت ءَ جوانیں کردے پیلو مکن اَنت۔
جارکش ءَ دیمتر ءَ گوشتگ کہ بلوچ چاگرد ءَ نوک آبادکاریں نزام ءُ تب دیم ءَ آرگ بوگ ءَ اَنت۔ ایشی پارست ءَ وتساچیں سرداری نزام ءُ کوھین نزام دیم ءَ آرگ بوتگ، ایشی رد ءَپہ بلوچ جنیناں جنجال ودی بوگ ءَ اَنت اے وتساچیں سرداری ءُ کوھنیں نزام ءِ ودی بوگ اِنت ایشی سرپد بوگ ھژدری اِنت۔ پہ اے وڑیں نزامے ءِ ھلاس کنگ ءَ بلوچ جنیناں دیم ءَ آھگ ءُ اے وتساچیں نزام ءِ بگیری ءَ گھگیری کنگ لوٹ ایت۔
بنجاھی جارکش ءَ گڈی ءَ گوشتگ کہ بلوچ جنینانی بنکی ھک، چاگردی ءُ وانگی جیڑہ، راجی زمہ واری، راجی جوڑشت ءَ کردار ءِ بارو ءَ ھشت مارچ ءَ دیوانے برجم دار ایں۔
