بلوچ یکجھتی کمیٹی ءِ جارکش ءَ 13 سال پیش 18 پروری ءَ توتک ءَ لشکر ءِ زوراکی ءُ سند ءَ سیاسی ءُ چاگردی کارکن ھدایت لوھار ءِ کوش ایر جتگ ءُ گوشتگ کہ مرچی 13 سال پیش 18 پروری ءَ توتک ءَ لشکرکشی ءَ دو مردم شھید ءُ 24 مردم زور بیگواہ کنگ بوتگ کہ آ انگت ءَ بیگواہ اَنت۔ اے سرڈگار ءِ سر ءَ 25 جنوری 2013 ءَ مچی مانشجاہ گندگ بوگ ءَ بلوچ چکچینی ءِ سر ءَ گپ کنگ ءَ نوکیں دردیگیں کسھے داتگ۔ اے درگت ءَ بلوچ یکجھتی کمیٹی ءَ بلوچ چکچینی ءِ درگت ءَ اے روچ ءِ دارگ ءِ جار جتگ۔ توتک ءَ لشکرکشی ءَ زور بیگواہ کنگ بوتگیں مردم انگت بیگواہ اَنت، چہ آیاں باز مردم مچی مانشجاھاں کبر کنگ بوتگ اَنت۔ لشکرکشی ءِ میان ءَ دو ورنا ناھک ءَ شھید کنگ بوتگ۔ توتک لشکرکشی ءَ پد اود ءَ مردم پہ کشندہ ٹولی ءِ زوراکیاں یل کنگ بوتگ اَنت ءُ لّس مردمانی زندمان جنجالانی دیمپان اَنت۔
جارکش ءَ گوشتگ کہ بلوچستان ءَ چوشیں روچ نیست اود ءَ یک ھندے ءَ لشکرکشی کنگ مہ بیت، بلکیں ھمک روچ کجام ھم ھند ءُ میتگاں لشکرکشی ءِ نام ءَ مردم آوار جنگ بوگ ءُ رند ءَ کشگ ریاست ءِ نیمگ ءَ دودے جوڑ بوتگ۔ انوگیں روچاں لشکرکشی ءِ تہ ءَ تیزی گندگ بوتگ۔ یک نیمگے ءَ بلوچانی کشت ءُ کوش ءِ درچ برجاہ اِنت ءُ دومی نیمگ ءَ پاکستان ءِ تہ ءَ آدگہ راجانی بگیری ءَ ریاست ءِ زوراکی ھلاس بوگ ءِ نام ءَ نہ زان اَنت۔
آئی ءَ گوشتگ کہ ھدایت لوھار پہ تیوگیں سند ءِ زور بیگواھی ءِ وڑیں رستری کار ءِ بگیری ءَ یک ترندیں توارے بوتگ کہ آئی ناھکیں کوش نزوریں راجانی بگیری ءَ ریاست ءِ زوراکیانی درچ اِنت گوں وھد ءِ ھواری ءَ تیز بوگ ءَ اِنت۔ ھدایت لوھار ءِ کوش ءَ ریاست ءَ نزوریں راجان ءَ ھمے کلوہ داتگ کہ پاکستان ءِ تہ ءَ نزوریں راج گوں مھکمی ءَ ریاست ءِ بگیری ءَ یکجاہ بہ بنت توار چست بہ کن اَنت ءُ جھد بہ کن اَنت۔ بلوچستان ءُ سند ءَ ھوار پاکستان ءِ کجام ھم کنڈ ءَ نزوریں راج ایمنیں زھرشانی ءَ گندگ بنت، پمیشکا اود ءَ سیاسی کارکن پہ وتی مردمانی ھکاں پاد کاینت ءُ توار چست کن اَنت، ریاست ءِ بگیری ءَ جھد کنگ بندات کنگ بیت۔
جارکش ءَ گوشتگ کہ پاکستان ءَ پہ نزورینانی توار ءِ دارگ ءَ ریاست نزوریں راجاں چہ مردمی ھکاں زبھر کنگ لوٹ ایت ءُ ھمے جھد ءَ آ ھدایت لوھار ءِ وڑیں سیاسی کارکناں نشانگ کنت، ما آئی کوش ءَ گوں ترندیں دانکاں ایر جن ایں ءُ کشندھانی دزگیر کنگ ءُ آیانی کانود ءِ رد ءَ جست گرگ ءِ لوٹ ءَ کن ایں۔
جارکش ءَ بلوچستان ءَ برجاھیں مردمی ھکانی پادمالیانی بند کنگ، توتک ءَ لشکرکشی ءِ میان ءَ آوار جنگ بوتگیں مردمانی آجوئی، ھدایت لوھار ءِ کوش ءَ ھواریں میاربارانی کانود ءِ رد ءَ جست گرگ ءِ لوٹ کرتگ ءُ گوشتگ کہ ریاست ءَ زانگ لوٹ ایت کہ بلوچستان ءِ مردم دلوت نہ اَنت آیانی زوریں بیگواھی ءَ پد کجام وھد ءَ بہ لوٹ ایت کش ایت۔ بلوچستان ءَ انوگیں چست بوتگیں زرمبشت زوراکیانی پژدر ءَ بوتگ، بلے ریاست چہ اے زرمبشت ءَ سرپد بوگ ءَ نہ اِنت ءُ دروگیں میڑاں ھوار کشت ءُ کوش ءُ مردمانی زوریں بیگواھی ءِ درچ برجاہ اِنت اے زوت بند کنگ بہ بیت۔
