کیچ: تربت ءَ زی بیگاہ ءَ زورگریں پاکستانی لشکر ءِ جوڑ کرتگیں چیریں ادارھانی کارمنداں دودا ھان ء لال بکش نامیں ورنایے آوار جتگ، آئی کھول ءَ زوریں بیگواھی ءِ بگیری ءَ مرچی تربت بازار ءَ زھرشانی کرتگ۔
اھوالکار ءِ رد ءَ زور بیگواھیں دودا ھان ءِ کھول ءِ ھواری ءَ جنین ءُ زھگ، ھندی مردماں بازیں کچے ءَ بھر زرتگ ءُ شھید پدا چاراہ ءَ نشتگ اَنت۔ زھرشانی کنوکیں مردماں پاکستانی لشکر ءِ زوراکیانی بگیری ءَ اوگام جتگ۔
آیانی گوشگ اِنت کہ زور بیگواھیں دودا ھان ء لال بکش بلوچی بازار میری ءِ جاہ منند اِنت کہ زی بیگاہ ءِ شش ءَ گسانی نزیک ءَ ویگو گاڑی ءَ سواریں سلاہ بندیں مردماں آوار جتگ ءُ بیگواہ کرتگ۔
آیاں گوشتگ کہ دودا ھان یک رندے پیسر ءَ دسمبر 2023 ءَ آوار جنگ ءُ بیگواہ کنگ بوتگ، لھتیں روچاں پد یل کنگ بوتگ، اے آئی دومی رند اِنت کہ زور بیگواہ کنگ بوتگ۔
زھرشانی کنوکیں مردماں گوں وتگڑیں سرکار ءَ لوٹ کرتگ ءُ گوشتگ کہ پہ دودا ھان ءِ آجوئی ءَ گامگیج بزور ایت ءُ دودا ھان زوتاں چہ زوت آجو کنگ بہ بیت۔
