بلوچ اسٹوڈنٹس کونسل لاھور ءِ جارکش ءَ وتی شنگ کرتگیں درشانی ءَ گوشتگ کہ تیوگیں وانگجاھاں سرپد کنگ لوٹ ایں کہ مرچی پنجاپ زانشتجاہ ءَ ناشرکاریں گل اسلامی جمئیت تلبہ ءَ پنجاپ زانشتجاہ ءَ بلوچ ءُ پشتون نودربرانی سر ءَ اُرش کرتگ۔ سائنس وانشجاہ ءَ ناشرکار بازیں کچے ءَ پترتگ اَنت ءُ زانشتجاہ ءِ نودربر ناھک ءَ لَٹ شاپ کرتگ ءُ چہ ایشی ءَ بازیں نودربرے زدگ ءُ دزگیر کنگ بیتگ۔
جارکش ءَ گوشتگ کہ مرچی جمئیت ءِ ناشرکاراں پولیس ءِ ساڑی بیگ ءَ مئے نودربرانی سر ءَ تیرگواری کرتگ۔ لَٹ شاپ کرتگ اَنت ءُ بازیں نودربرے زدگ کرتگ ءُ جستگ اَنت۔ چہ جمئیت ءِ تچک ءَ پد پولیس ءَ بلوچ ءُ پشتون نودربر لَٹ شاپ کرتگ اَنت، چہ وابجاہ ءِ جتاھیں جاھاں نودربر دزگیر کرتگ۔
یات بہ بہ اِت کہ جمیئت ءِ ناشرکارانی سر ءَ پولیس ءَ ھچ وڑیں کاروائی نہ کُرتگ۔ ما ایشی ءَ گوں ترندی ءَ ایر جن ایں ءُ ما ھمے لوٹ ءَ کن ایں کہ مئے دزگیر بیتگیں تیوگیں نودربر یل کنگ بہ بنت۔
زانشتجاہ ءِ تہ ءَ جاورانی ناگیگ کنوکیں ناشریں جمیئت ءِ ناشرکارانی بگیری ءَ کاروائی کنگ بہ بیت۔ جارکش ءَ گوشتگ کہ بی ایس سی لاھور ءِ نیمگ ءَ ما جھان ءَ سرپد کنگ لوٹ ایں کہ بلوچ نودربرانی دزگیری ءِ درچ برجاہ اِنت۔ بلوچ نودربر جتاھیں جاھاں زوراکی ءِ نشانگ کنگ بیگ ءَ اَنت ءُ آیاں وابجاہ ءُ زانشتجاہ ءِ چہ جتاھیں جاھاں درکانودی آوار جنگ ءَ اَنت۔
بلوچ نودربراں ءَ پیش ءَ پنجاپ ءُ پاکستان جتاھیں زوراکیانی دیمپان کنگ ءُ زوراکی ءِ نشانگ کنگ بیتگ اَنت۔
اے پدر اِنت کہ بلوچ نودربر چہ وانگ ءُ زانگ ءِ گستاہ کنگ ءِ جھد کنگ بیگ ءَ اِنت۔ بلوچ نودربرانی پروپائلنگ کنگ ءِ یک کڑی یے گوستگیں روچاں ایرڈ زانشتجاہ اسلام آباد ءِ نودربر پیروز ءِ زورانسری بیگواھی اِنت کہ آئی ءِ انگت ءَ ھچ وڑیں ھال نیست۔
جارکش ءَ وتی درشان ءِ گُڈی ءَ لوٹ کرتگ کہ چنچو بلوچ ءُ پشتون نودربر دزگیر کنگ بیتگیں زوت ءَ چہ زوت یل کنگ بہ بنت ءُ جمئیت ءِ ناشرکار جُست کنگ بہ بنت۔ ما گوں تیوگیں مردمی اگبالانی پد جنوک، سیاسی ءُ چاگردی سروک، گوں نودربر گَلاں لوٹ کن ایں کہ آ بلوچ ءُ پشتون نودربرانی توار جوڑ بہ بنت ءُ پہ آیانی آجوئی ءَ وتی کرد ءَ پیلو بہ کن اَنت۔
بنشون: درشان | اکس: رسانکدر
