بلوچ نیشنل موومنٹ ( بی این ایم ) ءِ انسانی ھکانی ادارہ پانک ءَ پاکستان ریاست ءِ چیردستی ءَ کار کنوکیں کشندہ ٹولی ءِ تیرگواری ءَ راھی بلوچ ءُ بالاچ بلوچ ءِ کوش ایر جتگ۔
پانک ءَ کسان سالیں راھی بلوچ ء اسا بلوچ ءِ کوش ایر جتگ ءُ گوشتگ کہ کشندہ ٹولی ءِ کارمنداں پنچ جنوری 2026 ءَ کیچ ءِ ھوشاپ ءَ تیرگواری کرتگ ءُ کشتگ۔
آئی ءَ گوشتگ کہ زھگ ءِ کوش میان استمانی انسانی ھکانی کانود ءِ بگیری اِنت ءُ بلوچستان ءَ برجاھیں ریاستی بے مھاری ءَ پیش دار ایت۔
پانک ءَ گوشتگ کہ پہ ریاستاں ھژدری اِنت کہ آ زندگی ءِ ھکاں بزاں زھگانی ھکانی پھریز ءَ بہ کنت، درکانودی کوشانی درسیں کیسانی زوت پہ پٹ ءُ پول ءَ دلجمی بہ دنت۔ ریاستی چیردستی ءَ کارکنوکیں کشندہ ٹولی بے ترس ءَ یکشل ءَ زوراکی کنگ ءَ اَنت ءُ میان استمان زوت دلگوش بہ دنت۔
آئی ءَ گوں پاکستان سرکار ءَ لوٹ کرتگ کہ آ زوت اے زوراکیاں گِر ءُ دار بہ کنت، درسیں درکانودی سلاہ بندیں ٹولیاں ھلاس بہ کنت ءُ راھی بلوچ ءِ کھول ءَ انساپ بہ دنت۔ زھگانی ھکانی بابت ءَ ھیومن رائٹس کنویشن ءِ کولانی پاسداری ءَ بہ کنت۔
پانک ءَ گوشتگ کہ بالاچ بلوچ 8 جنوری 2026 ءَ پنجگور ءِ ھند تسپ ءَ کشندہ ٹولی ءِ کارمنداں تیرگواری کرتگ ءُ کشتگ۔
آئیءَ گوشتگ کہ پانک پنجگور ءِ ھند تسپ ءَ بالاچ بلوچء ھامد ھسین ءِ کوش ءِ ھال ءِ اش کنگ ءَ سکا بژنیگ اِنت، اود ءَ ریاست ءِ جوڑ کرتگیں کشندہ ٹولی ءِ کارمنداں دزگیر کنگءِ جھد کرتگ ءُ آ جستگ گڑا تیر گواری کنگءُ کشگ بوتگ۔
آئیءَ گوشتگ کہ اے کوش بلوچستان ءَ برجاھیں زوراکیاں پیش دار ایت کہ اود ءَ پاکستانی پوج پہ زوریں بیگواھیءُ نشانگ کنگ ءَ وتی کشندہ ٹولی ءَ کار گرگ ءَ اِنت، آ گیشتر سیاسی ءُ چاگردی کارکن ءُ آیاں کھولاں نشانگ کنگ ءَ اَنت۔ اے وڑیں گامگیج میان استمانی انسانی ھکانی کانود ءِ بگیری اِنت۔
