ماں کابل شھر ءَ گوں اھوالکار آں تران کنان ءَ اوگانستان ءِ امریکی بُنجاھی سروک جنرل پرینک کنیت مکینزی ءَ گْوشتگ کہ پہ اوگان راجی لشکر ءِ جنگی کُمک ءَ امریکہ ءَ وتی بالیگرابانی بمب گْواری ءُ جنگی اُرش تْرُند کُرتگ اَنت ءُ ھمے اُرشانی تْرّندی ءَ یکشل ءَ برجاہ بنت۔
آئی گْوشتگ تالبان ھمے جُھد ءَ اَنت کہ اوگانستان ءَ انچیں جاورے ودی بہ بیت کہ چہ ایشی ءَ آیانی باج برگ ءِ مارشت ودی بہ بیت بلے اِے درگت ءَ تالبان رَد اَنت ءُ آیاں ھچ وڑ ءَ باج نہ رس ایت۔
چہ اِے دیوان ءَ امریکی جنگی سروک ءَ ھمے باوری ھم داتگ کہ 31 اگست ءَ چہ اوگانستان ءَ امریکی لشکر ءِ سرجمی ءَ درکپگ ءَ پد ھم پہ اوگان راجی لشکر ءِ کُمک ءَ امریکہ ءِ جنگی کُمک یکشل ءَ برجاہ بیت ءُ ھمے تیوگیں جنگی کُمک چہ آزمان ءَ بالیگرابانی بمب گْواری ءُ میزائیلانی اُرش ءِ دْروشم ءَ بنت۔
ایشی ءَ پیسر اوگانستان ءِ امریکی لشکر ءِ سروگان ءَ ماں گوں اوگان راجمستر اشرپ گنی ءُ دِگہ وزیراں گند ءُ نِند کُرتگ۔ ماں اِے دیم پہ دیمی گند ءُ نِند ءَ دستیگ کُرتگیں دمگانی آجو کنگ ءِ بابت ءَ گپ ءُ تْران بیتگ۔
ایشی ءَ پیش اوگان تھی کارانی وزیر ءَ گْوشتگ کہ دو ماہ ءَ پیش تالبان ءِ دستیگ کُرتگیں دمگانی آجو کنگ ءَ شَور ءُ مراسا اڈ دیگ بیتگ۔ نی بس کار بندات کنگ لوٹ ایت۔ چہ ایشی ءَ پیش راجمستر اشرپ گنی ءَ ھم گْوشتگ اَت کہ تالبان ءِ بگیری ءَ شش ماہ ءِ جنگی مَراسا تیار اِنت ءُ شش ماہ ءَ پد ءَ اوگانستان ءِ جاور یکدم بدل بنت۔
ما بے ھال مہ بہ ایں کہ سے روچ ءَ پیش زِرباری کندھار ءُ ھِلمند ولایت ءِ بازیں دمگاں امریکی جنگی بالیگراباں ناشرکاریں تالبان جنگولانی جنگی کاروان، بُنجاہ ءُ سنگرانی سر ءَ اُرش کُرتگ اَت چہ ایشی ءَ تالبان ءِ پنچ جنگی کماندار ءَ ھوار بازیں کچے ءَ جنگول مُرتگ ءُ بے کساس جنگی آسراتیانی تاوانے رستگ۔
دومی نیمگ ءَ اوگان راجی پھزگ ءِ کارگس ءَ وتی جار ءَ گْوشتگ کہ پہ دزگِیر کُرتگیں دمگانی آجوئی ءَ جنگی تیاری ءُ جُھد بیگ ءَ اِنت، گْوستگیں بیست ءُ چار ادارانی تہ ءَ دُژمن ءِ 170 جنگول کُشگ بیتگ ءُ دژمن ءِ بگیری ءَ مئے راجی لشکر ءِ بُرزی ءُ جھلی جنگی اُرش یکشل ءَ برجاہ اَنت۔
راجی پھزگ ءِ جارکش واجہ پواد امن ءَ گْوشتگ "مئے راجی لشکر ماں جنگ ءَ باج برگ ءَ اِنت چہ ایشی ءَ دژمن پدکِنِزگ ءَ لاچار اِنت ھمک روچ راجی لشکر چہ دژمن ءَ کوچگ ءُ دمگاں آجو کنان اِنت”
بنشون: مانیٹرنگ ڈسک | اکس : دامگ
