شال: پہ زوربیگواھیں مردمانی پد جنگ ءَ برجاھیں وی بی ایم پی ءِ زھرشانی گدان ءَ 6006 روچ سرجم بوتگ کہ شال پریس کلب ءِ دیم ءَ گل ءِ سروک نسراللہ ءِ سروکی ءَ برجاہ بوتگ۔
زھرشانی گدان ءَ جتائیں بھرگاں سیادی داروکیں مردم آتکگ ءُ گوں بیگواھیں مردمانی کھولاں ھمدردی درشان کرتگ۔
وی بی ایم پی ءِ چیئرمین نسراللہ بلوچ ءَ وتی شنگ کرتگیں درشانے ءَ گوشتگ کہ بیگواھیں مردمانی کھول وتی مردمانی کیساں گل ءِ کر ءَ یاداشت بہ کن اَنت۔ دانکہ بیگواھیں مردمانی کھول گوں منانکاں دیم ءَ نیا اَنت گل کیس ءِ سر ءَ کانودی کاروائی کنگ ءِ لوٹ ءَ کرت نہ کنت نیکہ ڈیھ ءُ جھانی ادارہ اے کیس ءَ زور اَنت۔ بزانکہ کھول ءَ ابید کیس ءَ ھچ بستار نیست۔
آئی گوشتگ کہ بیگواھیں مردمانی آجوئی ءُ زوربیگواھیانی جیڑہ ءِ گیش ءُ گیوار کنگ ءَ الّمی اِنت کہ درسیں بیگواھیں مردمانی کھول منانک ءِ ھواری ءَ دیم ءَ بیا اَنت ۔
نسراللہ بلوچ ءَ گوں سیاسی ٹولی ءُ نودربر گلاں لوٹ کرتگ ءُ گوشتگ کہ آ انسانی ھمدردی ءِ بنیاد ءَ بیگواھیں مردمانی جیڑھانی سر ءَ توار چست بہ کن اَنت ۔
