ایران ءِ سیزدھمی راجمستری گیچنکاری مرچی بیگ ءَ اِنت۔ایرانی راھشون آیت اللہ ھامنائی ءَ وتی ووٹ داتگ۔ گچینکاری ءَ پیش گُڈی دمان ءَ سَے امیدوار چہ گچینکاری ءَ دزکش بیتگ ءُ چار امیدوار دیم پہ دیم اَنت۔
ابراھیم رائیسی، ابدلناسر، امیر ھسین کازی ءُ مھسن رزائی دیم پہ دیم اَنت۔ابراھیم رئیسی مھکم تریں امیدوار اِنت ءُ گوں ابدلناسر ھمتی ءَ دیم پہ دیم اِنت۔
پہ راجمستری ءِ اُگدہ ءَ51 درسد ووٹ پکار بیت ءُ اگاں چوش نہ بوت گڑا یک ھپتگے ءَ پد ھمایاں کہ چہ دُرساں گیش ووٹ گیپتگ 2 امیدوار ءِ میان ءَ گچینکاری بیت۔
ایرانی راھشون آیت اللہ ھامنائی ءَ وتی کلوھے ءَ گْوشتگ کہ مرچیگیں روچ پہ ایرانی راج ءَ باز ارزیشتداریت،من مدام راج پہ گچینکاری ءَ بھر زورگ ءِ گْوشتگ۔ایران گچینکاری ءِ آسر ءَ جھان ءَ باز نپ زُرت کنت۔
راجمستری گچینکاری ءَ 5 کروڑ 90 لک مردم وتی ھک ءَ کارمرد کُرت کن اَنت۔ایران ءَ راجمستری اُگدہ چہ مردمانی ووٹاں گچین کنگ بیت۔ 18 سال یا مستریں اُمر ءِ شھری ووٹ دات کن اَنت۔ ایران ءِ انیگیں راجمستر ھسن روھانی 2013 ءَ اولی بر ءَ گچین بیتگ اَت ءُ دومی رند ءَ 2017 ءِ گچینکاری ءَ پد ءَ گچین کنگ بیتگ اَت۔ایران ءِ راھبند ءِ رد ءَ آ یکشلہ سَے رند ءَ راجمستری ءِ گچینکاری ءَ اوشتات نہ کنت۔
ایران ءَ ھمک چار سال ءِ سر ءَ راجمستری گچینکاری بیت امیدوار چہ شورا نگھبان ءِ نیمگ ءَ دارگ بنت۔پمشکہ شورا نگھبان ءَ ایران ءِ توانمندتریں تْرامگیج گمان کنگ بیت۔راھبند ءِ رد ءَ آیت اللہ الی ھامنائی ءِ پرمان ءِ سر ءَ شورا راجمستری امیدواراں راھبند دیگ ءِ ھک ءَ دار ایت۔
شورا نگھباں ءِ 12 باسک اَنت ایشانی تہ ءَ 6 باسک چہ آیت اللہ الی ھامنائی ءِ نیمگ ءَ دارگ بیت وھدے کہ آدگہ شش ایں کانودی زانوگراں وزیر ءِ کانود گچین کنت۔
اے بری ھما امیدوار گچین کنگ بیتگ اَنت کہ آیاں استان ءِ تْرامگیجانی تہ ءَ کم چہ کم چار سال کار کُرتگ ءُ پہ آیاں اے ھم ھژدری اِنت کہ 20 لک ءَ گیش آبادیں شھراں گورنر بیتگ،یا دگہ وزیری اُگدھے ءِ سر ءَ بیتگ۔ایشی ءَ ابید ایرانی لشکر ءِ تہ ءَ میجر جنرل یا چہ ایشی ءَ مستریں سروگانے بیتگ گڑا راجمستری گچینکاری ءَ بھر زورگ ءِ موکل ھست۔
