امریکی لشکرءِ درکپگءَ پَد چین کابُل سرکار ءِ گون ءَ نزیکی کنگ ءَ گیشاں چہ گیش جھد کنگ ءَ اِنت۔
چینءِ سرکاری ھال رسان شینھوا ءِ رد ءَ چین،اوگانستان ءُ پاکستان ءِ دری کارانی وزیراں وت ماں ھم پَتّ بیتگ اَنت کہ دری لشکریانی دراھگ مھکم ءُ زمہ واریں رنگے ءَ بہ بیت، داں ناشرکار پدا وتارا مھکم کُرت مکن اَنت۔
چینءِ دری کارانی وزیر وانگ یی ءَ گوشتگ کہ اے ھژدری ایں کہ سئیں ڈیھ اوگانستان ءُ آئی ءِ ھمساھگیں ڈیھانی نپ ءَ وتی گپ ءُ تراناں دیم ءَ بہ جُنزین اَنت۔
آئیءَ دیم ترا گوشتگ کہ در مُلکی لشکریانی دارھگ ءِ ھواری ءَ اوگانستان ءُ آئی ءِ کش ءُ گوراں ناشرکاری گیش بیان اِنت۔
چین دراجیں مُدّتی ءَ اے گپ ءِ سرا دِلگران بیتگ کہ امریکی لشکر پرچہ اوگانستان ءَ نِشتگ بلے اے گپءَ ھم پریشان ایں کہ اوگانستان یک برے پدا ناشرکانی بُنجل جوڈ مہ بیت۔
