نیشنل ڈیموکریٹک پارٹی ءِ بنجاھی جارکش ءَ وتی درشانے ءَ این ڈی پی ءِ بنجاھی سروک گنی بلوچ ءِ زوریں بیگواھی ءِ سر ءَ بژن درشان کرتگ ءُ گوشتگ کہ مرچی آئی زوریں بیگواھی ءَ یازدہ ماہ گوستگ بلے انگت ءَ آئی کھول ءُ آئی پارٹی ءَ آئی سلامتی ءُ جاہ ءِ بابت ءَ ھچ وڑیں سرپدی دیگ ءَ نہ اَنت، چہ ایشی ءَ درسیں مردم سکا جنجال اَنت۔
آئی ءَ گوشتگ کہ پارٹی ءُ آئی کھول ءَ آئین ءُ کانود ءِ رد ءَ ھرپیمیں گامگیج زرتگ۔ اے میان ءَ ایپ آئی آر نبشتہ کرتگ ءُ لوٹ کرتگ، ایپ آئی آر ءِ نبشتہ نہ کنگ ءِ سوب ءَ آمیدگس ءَ شتگ آں، بلوچستان آمیدگس ءَ آئینی لوٹ نبشتہ کرتگ، پہ زور بیگواھیں مردماں جوڑ بوتگیں کمیشن ءَ کیس یاداشت کرتگ ءُ اود ءَ پیشی ءَ شتگ اَنت، چہ ایشی ءَ ابید درشان، پریس کانپرنس ءُ زھرشانی کرتگ۔ چہ اے درسیں آئین ءُ کانودی کاروائیاں ابید انگت چہ سرکار ءِ نیمگ ءَ ھچ وڑیں گامگیج زورگ نہ بوتگ، دراجیں وھدے ءَ پد آئی ایپ آئی آر نبشتہ کنگ بوتگ۔
جارکش ءَ گوشتگ کہ گنی بلوچ یک پرایمنیں سیاسی کارکنے آئی کار کتاب بھا کنگ اِنت ءُ ھمیشی رد ءَ وتی زند ءَ گوازینگ ءَ بوتگ۔ آ جمھوریت ءِ منوگریں مردمے ءُ مدام سیاسی ءُ آئی جھد کرتگ۔ مرچی آئی درکانود، درآئینی ءُ در انسانی ھساب ءَ بندیگ کنگ نہ تھنا آئی بنکی ھکانی بگیری اِنت، بلکیں گوں آئی ءَ بندوکیں درسیں مردماں مچی سزا ءِ دیمپان کنگ اِنت۔
آئی ءَ گوشتگ کہ گنی بلوچ زوت آمیدگس ءَ پیش کنگ ءُ دیم ءَ آرگ بہ بیت، پہ آئی سلامتی ءِ بابت ءَ سرپدی دیگ بہ بیت ءُ آئین ءُ کانود ءِ رد ءَ پہ آئی ھکاں دلجمی دیگ بہ بیت۔
بنشون: درشان. اکس: مونوگرام
