بلوچ نیشنل موومنٹ ( بی این ایم ) ءِ کارگشاد دل مراد بلوچ ءَ وتی درشان ءَ گوشتگ کہ پاکستان ءِ نیمگ ءَ کابل نادراھجاہ ءَ بمبگواری کنگ سکا شرمی ءُ درانسانی کارے۔ اوگان سرڈگار ءِ سر ءَ پاکستان ءِ زوراکی اوگانستان ءِ آجوئی ءِ سر ءَ تچک ءَ ارش، مزنیں جنگی میارباری یے ءُ ایشی ایر جن آں۔ بلوچ نیشنل موومنٹ جنگ ءِ اے گرانیں ساھت ءَ گوں شرپمندیں اوگان راج ءَ اوشتاتگ۔
آئی ءَ گوشتگ کہ بلوچ راج ءُ اوگان مھلوک ءِ میان ءَ سیادی تھنا ھمساھگی نہ اِنت، بلکیں گوستانکی ءُ براتی یے۔ مئے گوستانک شاید اِنت کہ ما گرانیں ساھتاں یکے دومی ءِ گون ءَ دست ماں دست بوتگ ایں۔ ما روایتانی منوگر این ءُ مرچی ھم بلوچ وتی برات ءُ شرپمندیں ھمساھگ ءِ گون ءَ اوشتاتگ۔
دل مراد بلوچ ءَ گوشتگ کہ پاکستان وتی پوجی زور ءِ تونگری ءَ چہ ایشی شموشکار اِنت کہ آئی اوگانستان ءِ سر ءَ ارش کرتگ، ایشی سویت یونین ءُ انوں جھان ءِ توانمندیں امریکہ ءُ جھان ءِ چہ درستاں مستریں پوجی اتھاد نیٹو پروش داتگ۔
آئی ءَ گوشتگ کہ پاکستان ءَ اے ارشانی بندات چہ لھتیں لوٹانی بنیاد ءَ کرتگ، بلے جھان زانت کہ پاکستان ءِ جیڑہ سیمسر، آجو ءُ وتواکیں اوگانستان یا اوگان ءِ واکداری ءِ مزنی اِنت۔ سیمسر ءِ بوگ چہ پاکستان ءَ ساری ءِ جیڑھے ایشی سے مزنیں پریک اَنت، بزاں پاکستان، اوگانستان ءُ بلوچ اِنت۔ ایشی چونیں ھم پریکے چہ وتی منشا یا نپانی رد ءَ گیش ءُ گیوار کرت نہ کنت۔ اوگانستان ءَ جتائیں سرکار اتکگ اَنت، بادشاہ، کمیونیزم، مذھبی ءُ داں سروکی ءِ نزام، چہ ھزار ایرادگریاں ابید درسیں سرکار سیمسر ءِ گپ ءِ سر ءَ رازیگ نہ بوتگ اَنت۔ پمشکا اے جیڑہ انگت ھست۔
انوں ھم داں بیست سالاں پاکستان چو باڑھی ءِ وڑ ءَ کارمرز بوتگ امریکہ ءُ نیٹو ءِ چمانی دیم ءَ سیمسر ءِ جیڑہ گیش ءُ گیوار کرت نہ کرتگ۔ ایشی بنیادی سوب ھمیش اِنت کہ راجی ھستمان ءِ جیڑہ ءَ سرکار نہ بلکیں راج گیش ءُ گیوار کن اَنت ءُ چونیں ھم راجے وتی ساڑی بوگ ءَ وتی بھر ءَ دگہ دژمنیں کسابے ءِ دست ءَ بُرگ ءِ موکل ءَ نہ دنت گڑا اوگان راج ھم ھمے وڑ کنگ ءَ اِنت۔
دل مراد بلوچ ءَ گوشتگ کہ پاکستان ءِ دومی مستریں جیڑہ اوگانستان ءِ آجوئی ءُ وتواکی اِنت۔ سویت یونین ءِ بگیری ءَ روکپتی اتھاد ءِ بھر بوگ ءِ پیسلہ بہ بیت یا امریکہ ءُ نیٹو ءِ گون ءَ پاکستان ءِ یک نیمگے چہ باڑھی زراں وتی مالی جاورانی گھتری ءُ دومی نیمگ ءَ اوگانستان ءِ تباہ ءُ برباد کنگ ءَ ھوار بوتگ دانکہ اوگانستان ریاستے ءِ بستار ءَ مھکم مہ بیت ءُ گوں آجوئی ءَ وتی راجی تالہ ءُ راجی نپاں پیلو کرت مہ کنت۔ چہ سالاں پاکستان ءَ اوگانستان ءَ را "اسٹریٹیجک ڈپتھ” ءِ رد ءَ وتی پوجی بنگپ ءِ لڑا داشتگ دانکہ وتگڑیں سیمسر ءَ دگہ ترسے مہ بیت ءُ چہ اوگانستان ءِ سروکی ءَ پنجاپی ءِ نپ پیلو بہ بنت۔
آئی ءَ گوشتگ کہ اوگانستان ءَ پاکستان ءِ اے دوئیں ارادہ گوں ھاکاں ھوار کرتگ اَنت۔ مرچیگیں اوگانستان نہ پاکستان ءِ "اسٹریٹیجک ڈپتھ” ءِ منوگر اِنت ءُ نہ سیمسر ءَ میان استمانی سیمسرے منّ ایت۔ پمشکا پاکستان دمگ ءِ جیڑہ ءُ روکپتی ھیلھانی بستار ءَ نپ زورگ ءُ اوگانستان ءِ سر ءَ ارش کنگ ءَ اِنت۔ گوستانک شاید اِنت کہ توپک چگل دیگ پنجاپی ءِ بھر ءَ بوتگ، اوگانستان ءِ نہ، گوستانک کجام وھد ءَ ھم ھمائی کنت۔
بنشون: درشان اکس: دامگ
