بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ شھید آگا مھمد بلوچ ءِ شھیدی سالروچ ءِ درگت ءَ وتی درشانے ءَ گوشتگ کہ شھید آگا مھمود بلوچ راجی آجوئی جھد ءِ ھما دانشور ءُ رھشون اَت کہ آ چہ پیش دارگ ءُ برزیں گپ جنگ ءَ باز دور اَت۔ آئی ھمک کار، ھمک گپ ءُ ھمک گام سیاسی ءُ راجی زانشت ءِ مھکم کنگ ءُ پہ بلوچ چاگرد ءِ پگری بنیاد ءَ مھکم کنگ ءَ ببا داتگ اَت۔ بلوچ نودربر سیاست ءِ گون ءَ ھمگرنچ بوگ ءَ پد آ پگری پارست ءَ گوں آجوئی زرمبشت ءَ بندوک بوتگ ءُ پہ جھد ءِ مھکم کنگ ءَ یکشل ءَ کوشست ءَ بوتگ۔ آئی شخصیت گوں دانشوری ءِ جھلانکی، رھشونی ءِ بودناکی ءُ گوں لس مھملوک ءَ ھمگرنچ اَت۔
آئی ءَ گوشتگ کہ آگا مھمود جان نہ ایوک ءَ یک پگری رھشونے اَت بلکیں یک انچکیں پگری درسگاھے اَت چہ آئی بازیں ورنا متاسر بوتگ ءُ راجی زرمبشت ءَ ھوار بوتگ اَنت۔ آئی گپ ءُ تران، کرد ءُ کاراں مردمانی دلانی تہ ءَ آجوئی ءِ رژن بلینتگ ءُ آیان ءَ جھد ءِ راہ ءَ گام جنگ پرماتگ۔ آ اے گپ ءَ شر سرپد اَت کہ چونیں ھم زرمبشتے ءِ سوبمندی گوں ادارھانی مھکمی ءُ مچی زانشت ءَ ھمگرنچ اِنت، ھمے ھاترا آ ھمک وھد ءَ گوں املی جھد ءَ مشکول بوتگ۔
ڈاکٹر نسیم بلوچ ءَ گوشتگ کہ دژمن ءِ نشانگ ءَ بوگ ءَ ابید آ تمرد بوتگ، دانکہ 14 مارچ 2011 ءَ آئی شھیدی ءَ زرمبشت ءَ را یک ٹوھین تاوانے داتگ۔ ھما روچ ءَ راج چہ یک انچیں رھشونے ءَ زبھر بوتگ کہ آ چہ وتی کرد ءُ پگر ءَ یک کاملیں درسگاھے اَت۔
بنشون: درشان اکس: دامگ
