بلوچ راجی رھشونءُ بلوچستان لبریشن پرنٹ ( بی ایل ایپ ) ءِ سروک ڈاکٹر اللہ نزر بلوچ ءِ بی ایل ایپ ءِ نیمگ ءَ شنگ بیتگیں ماھتاک اسپر ءَ وتی شنگ کرتگیں کلوہ ( دانک ) ءَ گوشتگ کہ آئی ایس پی آر ءُ داھش ءِ انوگیں گپ بلوچ ءُ پشتون سیاسی ءُ انسانی ھکانی کارکن ءُ سروکانی بگیری ءَ جنگ ءِ جار اِنت۔
آئی ءَ گوشتگ کہ سرجمیں جھان ءَ دیستگ کجام وڑ ءَ اراک ءَ داھش ءِ باڑھی کشندھاں اسلام ءِ نام ءِ سر ءَ یزیدیانی جنین بندیگ کرتگ اَنت ءُ بازاراں بھا کرتگ اَنت ءُ کسانیں زھگانی گون ءَ زوراکی کرتگ ءُ وتی رستری پیش داشتگ۔ گوستانک گواہ اِنت کہ پاکستانی پوج وت ھمے کار ءَ کنگ ءَ اِنت۔ پاکستان نوں بلوچستان ءُ ھیبرپکتونواہ ءَ ھوار ھمساھگیں ڈیھانی بگیری ءَ وتی باڑھی داھش کراسان ءَ کار گرگ ءَ اِنت۔
آئی ءَ گوشتگ کہ اگاں کسے پہ مھمانی بلوچ ءِ کِر ءَ کیت گڑا بلوچ چہ وتی گنجاھش ءَ گیش آئی مھمانوازی ءَ کنت، اگاں کسے دژمن بہ بیت ءُ بیت گڑا بلوچ آئی ءَ گوستانکی پروشے ءِ نشانگ کنت۔ اے گوستانک ءَ مرچی بلوچ چہ وتی ءُ دژمن ءِ ھوناں نبشتہ کنگ ءَ اِنت۔
ڈاکٹر اللہ نزر بلوچ ءَ گوشتگ کہ پاکستان ءِ ناشریں پوج ءِ پروکسی ھمے داھشن کراسان ءِ کشندھاں لھتیں سال پیش مستونگ ءَ میلاد النبی ءِ پروگرام ءَ مئے درزنانی کچ ءَ سادگیں بلوچ شھید کرتگ اَنت ءُ پد ءَ مستونگ ءَ زھگانی وانگجاہ ءِ سر ءَ ارش کرتگ ءُ مئے زھگ شھید ءُ ٹپی کرتگ اَنت۔ ھمے وڑ ءَ آیاں شال ءَ سردار بھادر ھان ویمن یونیورسٹی ءِ کودکیں نودربرانی بروکیں بس گوں تراک ءَ تباہ کرتگ ایشی آسر ءَ بازیں نودربر شھید ءُ ٹپی بیتگ اَنت۔ لھتیں سال پیش ھمے وڑ ءَ داھش ءَ شال ءَ وتکش تراکے ءَ پنجاہ ءَ گیش وکیل شھید ءُ چہ ایشی ءَ گیش ٹپی کرتگ۔
بلوچ رھشون ءَ گوشتگ کہ ریاست ءِ نیمگ ءَ داھش ءِ کارکنانی جاہ دیگ ءُ آیانی پھازداری ءِ زمہ واری ھم زورگ بیتگ، نوں بلوچ ءِ زھگ زھگ زانت کہ اے باڑھی نوکر کے اِنت۔
