ایمنسٹی انٹر نیشنل ءَ اوگانستان ءِ استان ننگرھار ءَ 21 ءُ 22 پروری ءِ میانی شپ ءَ پاکستان ءِ نیمگ ءَ بوتگیں بالی ارشانی آسر ءَ شھریانی بیران ءُ ٹپی بوگ ءِ سر ءَ بژن درشان کرتگ ءُ لوٹ کرتگ کہ شھریانی بوتگیں تاوانانی بابت ءَ پٹ ءُ پول کنگ بہ بیت ءُ راستی دیم ءَ آرگ بہ بیت ءُ زمہ وار جست گرگ بہ بنت۔
ایمنسٹی انٹرنیشنل ءِ رد ءَ اے اولی رند نہ اِنت کہ سیمسر ءِ میڑانی میان ءَ شھری سانمند بوتگ اَنت، چہ ایشی ءَ پیش اوگانستان ءَ اکوام متھدہ ءِ کمکی مشن (یوناما) ءَ چہ اکتوبر ءَ داں دسمبر 2025 ءِ میان ءَ پاکستانی پوج ءِ کاروائیانی آسر ءَ 70 شھریانی بیران ءُ 478 ٹپی بوگ ءِ زمہ وار پاکستانی پوج اِنت۔ اے ویل ھما وھد ءَ بوتگ اَنت کہ اوگانستان ءِ تالبان ءُ پاکستانی پوج ءِ میان ءَ سیمسر ءَ میڑ گیش بوتگ اَنت۔
گل ءَ پوج زور داتگ اَنت کہ آ میان استمانی انسانی کانود ءِ رد ءَ وتی زمہ واریانی پاسداری ءَ بہ کن اَنت ءُ پہ شھریانی پھریزگ ءَ دلگوش ءَ گور بہ کن اَنت۔
ایمنسٹی انٹرنیشنل ءَ زور داتگ کہ جنگانی میان ءَ شھریانی پھاز داری کنگ بہ بیت ءُ بگیریانی بابت ءَ پٹ ءُ پول کنگ بہ بیت دانکہ گوں سانمندیں کھولاں انساپ کنگ بہ بیت۔
بنشون: درشان اکس: دامگ
