بلوچ راجدوستین سروک رھیم بلوچ ایڈوکیٹ ءَ وتی درشان ءَ پاکستان ءِ نیمگ ءَ اوگانستان ءِ استان ننگرھار ءُ پکتیکا ءَ ارش ایر جتگ اَنت ءُ گوشتگ کہ اے ارش میان استمانی کانود، اکوام متھدہ ءِ منشور ءُ اوگانستان ءِ وتواکی ءِ بگیری اِنت۔
رھیم بلوچ ءَ گوشتگ کہ من گوں درسیں کھولاں دلپدردی درشان کن آں کہ آیانی آزیز بیران بوتگ اَنت ءُ پہ ٹپی بوتگینانی سلامتی ءَ دوا کن آں۔
آئی ءَ گوشتگ کہ انچو گمان بیت پاکستان ءِ ھوش شتگ کہ گوستگیں دو دھکانی میان ءَ آئی وتی ھمساھگیں ڈیھ ایران، اوگانستان ءُ ھندوستان ءِ بگیری ءَ برزی ارش کرتگ کہ اے میان استمانی کانود ءُ وتواکیں ریاستانی ھکانی یکشل ءَ بگیری اِنت۔
بلوچ سروک ءَ گوشتگ کہ بلوچستان ءَ برجاھیں پوجی کاروائیانی بابت ءَ یک سکا مزنیں ترسے کہ اود ءَ زوریں بیگواھی،آزاردھی، درکانودی کوش، کانود ءِ رد ءَ کار نہ گرگ ءُ مچی سزا ھوار اَنت۔ اے بابت ءَ اکوام متھدہ، انسانی ھکانی گل ءُ جھان ءِ سرجمیں جمھوری سرکار زوت دلگوش بدے اَنت دانکہ میان استمانی انسانی ھکانی کانود ءُ زمہ واریانی رد ءَ پہ پٹ ءُ پول ءُ جست گرگ ءَ دلجمی دیگ بہ بیت۔
بنشون: درشان. اکس: دامگ