بلوچ نیشنل موومنٹ ( بی این ایم ) ءَ ماں جرمنی ءِ شھر ٹریئر ءَ پورٹا نیگرا پلاٹس ءَ زھرشانی یے کرتگ ، ایشی ءِ مول بلوچستان ءَ برجاھیں زوراکی ءُ مزنیں رنگے ءَ مردمی ھکانی بگیریانی سھر کنگ اَت۔
زھرشانیاں مردمی ھکانی کارکن ءُ بلوچ راج ءِ پلہ مرزاں بھر زرتگ ۔ بھر زیروکاں گوں بلوچستان ءِ مردماں ھمدلی درشان کنان ءَ زور بیگواھی ، در آمیدگسی کوش ، ناراھیں دزگیری ، سیاسی بگیری ءُ مردمی ھکانی کارکنانی بگیری ءَ ریاستی زوراکی ءِ سر ءَ بے تاھیری پیش داشتگ۔ زھرشانی کنوکاں گْوشتگ پاکستانی ریاست اے کاراں پالیسی ءِ رنگ ءَ کنگ ءَ اِنت۔
زھرشانی ءِ میان ءَ کاگد ، زرمبشت ءُ گْوشتانکانی پارست ءَ چہ میان راج ، میان راجی مردمی ھکانی گل ءُ رسانک ءَ لوٹ کنگ بیتگ کہ آ بلوچستان ءِ جاورانی سر ءَ وتی بے تواری ءَ آسر بہ کن اَنت۔ گْوشتانک دیوکاں گْوشتگ کہ دھکاں برجاہ ءُ مردمی ھکانی گواچنیں لگتمالیاں پد ھم بلوچ راج ءِ درد ءُ دور ماں جھانی تلواں یکشل ءَ ڈالچار کنگ بیگ ءَ اَنت۔
اے دم ءُ درگت ءَ بی این ایم ءِ باسکاں جرمن ءُ انگریزی زبان ءَ پنتاک ھم بھر کرتگ۔
زھرشانی ءَ جنین ، چک ءُ زور بیگواھیں مردمانی کھولانی سر ءَ اے زوراکی ءِ تھلیں سان سھرا کنگ بیتگ اَنت۔ گْوشتانک دیوکاں گْوشتگ زور بیگواھیانی کھول ، گچینی مات ءُ چک سال گْوستگ اَنت کہ پر ایمنیں جھد ءِ پارست ءَ انساپ ءُ وتی لوگ ءِ مردمانی واتری ءِ لوٹ کنگ ءَ اَنت ، بلے انساپ ءِ جاہ ءَ آ مچانکی ڈنڈ ءِ دیمپان اَنت۔
لکمان ، وجاھت ، آسپ ، مجیب ابداللہ ، شارک ءُ حبیب ءِ پجیگ ءَ دگہ گْوشتانک دیوکاں زور بیگواھی ، در آمیدگسی کوش ءُ مچانکی ڈنڈ ترندی ءَ ایر جتگ اَنت۔
آیاں پاکستانی پوج ءِ بیڑ گوں ترندی ءَ ایر جتگ اَنت ءُ گْوشتگ پاکستانی پوج بلوچستان ءَ شھرمنندانی سر ءَ زوراکی کنگ ءَ اِنت۔ انیگیں روچاں گوادر ، مستونگ ءُ کیچ ءَ دھانی کچ ءَ مردم تچکے ءَ نشانگ کنگ ءُ کشگ بیتگ ءُ ڈرون ارشاں ھم شھرمنند کشگ بیگ ءَ اَنت۔زھرشانی کنوکاں گْوشتگ اے جاوراں میان راج ءِ زمہ واری بیت کہ آ گوں پاکستان ءَ وتی جنگی، گزرانکی، دیمپانی بائیواری ءُ سلاہ بھا کنگ ءِ رنگیں کارانی سر ءَ بہ جیڑ اَنت۔
زھرشانی کنوکاں مچانکی ڈند ءِ بدتریں ڈول ءِ سر ءَ گپ جنان ءَ گْوشتگ بلوچستان ءَ مردمی ھک ءُ سیاسی کارکنانی کھول ھم زور بیگواھیانی نشانگ اَنت۔نوکتریں درور بی این ایم ءِ سرکماش ڈاکٹر نسیم ءِ پت مھمد بکش ساجدی ، ناکو نئیم ساجدی ءُ رپیک ءِ زور بیگواھی اَنت۔ زھرشانی کنوکانی رد ءَ اے پمیشکا دزگیر کنگ بیتگ اَنت داں بی این ایم ءِ سرکماش چہ زْرمبشت ءُ سیاسی سرگرمیاں دزکش بہ بیت ۔
آئی ءَ گْوشتگ ڈاکٹر نسیم ءِ کھول یکشل ءَ پاکستانی زوراکیانی آماچ اِنت۔ آئی ءِ نزیکیں سیاد داں سالاں زور بیگواھیانی آماچ بیتگ اَنت، آئی ءِ نزیکیں سیادے پاکستانی پوج لوگانی تہ ءَ پترتگ ءُ درآمیدگسی کشتگ۔انیگیں روچاں دگہ راھشون ءُ باسکانی لوگ ءِ مردم ھم ترسینگ ءُ بیھار دیگ بیتگ اَنت۔
گْوشتانک دیوکاں تچک کرتگ کہ بی این ایم ءِ رھشون ءُ کارکن چہ پاکستانی لشکر ءِ اے کارپداں تشے ھم نہ ترس اَنت۔
آیاں نامداریں وکیل ایمان مزاری ءُ آئی ءِ لوگواجہ ھادی الی چٹا ءِ دزگیری ءِ سر ءَ ھم گپ جتگ ءُ گْوشتگ بلوچستان ءَ تیوک ءَ بلوچ سیاسی کارکنانی کھول مچانکی ڈنڈ ءِ نشانگ نہ اَنت بلکیں آیانی وکیل ءُ مردمی ھکانی کارکن ھم نشانگ کنگ بیگ ءَ اَنت۔ایمان مزاری ءُ ھادی الی چٹا پمیشکا زندانی اَنت کہ آ بلوچستان ءَ بیوکیں زوراکیانی سر ءَ گپ جن اَنت ءُ زور بیگواھیں مردمانی کیسانی رندگیر اَنت۔
زھرشانی کنوکاں چہ راجانی سنت ، یورپی سنت ءُ مردمی اگبالانی تْرامگیجاں لوٹ اتگ کہ آ بلوچستان ءَ برجاھیں مردمی اگبالانی سر ءَ آزادیں رنگے ءَ پٹ ءُ پول بہ کنائین اَنت ءُ میان راجی راھبندانی رد ءَ اے کارپدانی زمہ واراں جست بہ کن اَنت۔
بنشون؛ درشان اکس: بی این ایم
