بلوچستان لبریشن پرنٹ ءِ جارکش میجر گھرام بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که بیست ءُ چار اپریل ءِ شپ ءِ ادار یازده ءُ چل ءَ بی ایل ایپ ءِ سرمچاراں ھزدار ءِ ھند وڈ ءَ لوئی ءُ گڈیارو ءِ میانجی ءَ بلوچ ءِ مڈیانی لٹ ءُ پل ءَ ھواریں گران کیمتیں مادن ءَ باریں گاڑی تاوان داتگ اَنت ءُ ڈرائیور بلوچ بوگ ءِ سوب ءَ یل کرتگ اَنت.
آئی ءَ گوشتگ که پاکستانی لشکر ءَ په بلوچ ءِ مال ءُ مڈیانی لٹ ءُ پل ءَ بلوچستان ءِ جتائیں ھنداں په وتی کمکاری ءَ وتگڑیں سلاه بندیں ٹولی جوڑ کرتگ دانکه گوں اِے مڈیاں پنجاپ ءَ سیر ءُ بلوچ راج ءَ نیزگار به کنت. لشکر اِے سلاه بندیں ٹولیاں په ھندی مردمانی تُرسینگ ءُ بلوچ ءِ آجوئی زرمبشت ءِ بگیری ءَ کارمرز کنگ اِنت.
جارکش ءَ گوشتگ که په زورگریں ریاست ءِ زورگری ءِ مھکم کنگ ءُ په بلوچ سرمچارانی بگیری ءَ ناشرکاریں مردمانی مھکم کنگ ، سلاه بند کنگ ءُ پله مرزی ءَ نال ءَ سردار اسلم بزنجو ءِ زھگ شاه میر بزنجو ءِ سروکی ءَ یک وتگڑیں سلاه بندیں ٹولی یے جوڑ کنگ بیتگ.
آئی ءَ گوشتگ که یک زمه واریں راجی گلے ءِ بنیاد ءَ چه رسانکدر ءِ پارست ءَ اِے وٹگڑیں ٹولیانی مردماں کڈن کن اِیں که چه لشکر ءُ ھندی ناشرکارانی کمکاری ءَ پھریز به کن اَنت اگاں ناں ھرکس که بلوچ راج یا سرمچارانی بگیری ءِ کاراں ھوار بیت آئی ءَ نشانگ کن اِیں۔
میجر گھرام بلوچ ءَ وڈ ءَ بلوچ ءِ مڈیانی لٹ ءُ پل ءَ ھواریں گاڑیانی سر ءَ اُرش ءِ زمه واری من اِتگ گوشتگ که گاڑیانی درسیں واھنداں گوشگ لوٹ اِیں که آ گوں لٹ ءُ پلی شوربندیاں ھوار مه بنت
