بلوچ لبریشن آرمی (بی ایل اے) ءِ جارکش جیئند بلوچ ءَ وتی درشانے ءَ گوشتگ کہ آپریشن ھیروپ ءِ دومی بھر چارمی روچ اِنت داں انوں بلوچستان ءِ جتائیں دمگاں گوں ترندی ءَ برجاہ اِنت۔ نوشکی شھر ءَ ھوار بازیں ھنداں بی ایل اے ءِ سرمچاراں سنگر گپتگ ءُ نشتگ اَنت، چہ زمینی جاورانی رد ءَ دژمن بازیں جاھاں پروش وارتگ ءُ پد کنز اِتگ۔ بلوچ سرمچار گوں یکشلیں گھگیر ءَ مدام دژمن ءَ بے سوب کنگ ءَ اَنت۔
آئی گوشتگ کہ داں انوں زورگریں پاکستانی پوج، پولیس، سی ٹی ڈی ءُ پوج ءِ جوڑ کرتگیں کشندہ ٹولی ءِ کارمندانی مرگ ءِ کچ 280 ءِ نزیک ءَ سر بوتگ۔ زمینی جاور ھالانی بنیاد ءَ دژمن ءِ تاوان سکا باز اَنت۔ دژمن ءِ جانی ءُ مالی تاوان سرجم ءَ یکجاہ کنگ ءَ پد زوت رسانکدر ءَ شنگ کنگ بنت۔
جارکش ءَ گوشتگ کہ آپریشن ءِ میان ءَ بی ایل اے ءِ 35 سرمچار شھید بوتگ چہ آیاں 18 مجید بریگیڈ ءِ پدائی، 10 پتھ اسکواڈ ءُ ھپت ایس ٹی او ایس یونٹ ءِ سرمچار ھوار اَنت۔ شھیدانی سرجمیں ھال رند ءَ شنگ کنگ بنت۔
جارکش ءَ گوشتگ کہ پاکستانی پوج ءَ گوں سرمچاراں اے جنگ ءَ سرجم ءَ پروش وارتگ۔ وتی بے سوبی ءِ چیر دیگ ءَ زورگریں پوج بلوچ آبادیانی نشانگ کنگ ءَ اِنت ءُ ڈرون اُرش ءُ ھیلی کاپٹرانی سر ءَ تیرگواری کنگ ءَ اِنت۔ چہ ایشی ءَ باز بے میاریں بلوچ شھری شھید بوتگ اَنت۔ اے کاروائی دژمن ءِ اکلاکی، پوجی ءُ سیاسی پروش ءِ پدّریں منانکے۔
بنشون: درشان اکس: زرمبش
