بلوچ وومن پورم ءَ وتی شنگ کرتگیں درشانے ءَ گوشتگ کہ کمانچر بلوچ (سرور بلوچ ) یک راجی ازم کارے اَت کہ آ مُدام بلوچستان ءِ کوہ ءُ کوچگاں سپر کنان اَت ءُ ھمے ندارگانی ھسار ءَ زندگ اَت۔ چوناھا یک ایردستیں راجے ءِ تہ ءَ ھمک مردم وتی کرد ءَ پیلو کنگ ءَ اِنت ءُ ھمک مردم ءِ یک جِتائیں بستارے ھست، ھمے رنگ ءَ کمانچر بلوچ ھم بلوچ سرڈگار ءِ سرا یک جھدکارے اَت ءُ مُدام پہ ھمے زمین ءِ ھاک ءَ ھُدوک اَت ءُ وتی اکسکاری ءِ منّت ءَ پہ وتی ایردستیں راج ءَ مُدام جھد ءَ اَت۔
آئی گوشتگ کہ کمانچر ءَ مُدام وتارا ھما جاهاں سر کُتگ اَت کہ اودا زند گوازینگ ءَ بلوچ ءِ کِرّا ھچ آسراتی نیست اَت۔ گُژنگی، بزگی، دِرتہ پُچّی ، لاچاری نادراھی، چورھی، شپانک ءُ شوانگی ،بان ءُ گِدان ءُ کرگین گیابان ءَ جاہ منندیں بلوچانی سُتکگیں لوگ ءُ ویرانیں میتگانی اکس کمانچر ءَ وتی کیمرہ ءِ برکت ءَ گپت ءُ سرجمیں دُنیا ءَ را بلوچستان ءِ جاور، زیبائی ءَ ھوار زمین ءِ راستی ھم پیش داشتگ۔
آئی گوشتگ کہ کمانچر بلوچ یک راجی جھد کارے اَت ءُ زندگیں مردمے اَت ءُ بلوچ مُدام آئی ءَ گوں ھمے ندارگاں گیر کار ایت۔ کمانچر ماں راجدپتر ءِ تاکاں نمیرانیں چیدگ ءُ اکسے ، اے گرانیں ساھت ءَ بلوچ وومن پورم گوں آئی ءِ کھول ءِ گماں شریدار اِنت۔شالا ھاوند کمانچر ءِ گُڈی جاہ ءَ وش کنات ءُ آئی ءِ کھول ءَ را سگّ ءُ اوپار بہ دنت۔
