شال: پرندوشی چہ بولان پلازہ ءَ پاکستانی پوج ءِ دست ءَ آوار جنگ بوتگیں این ڈی پی ءِ سروک سلمان بلوچ ءُ دلیپ داس آجو بوتگ اَنت ءُ ساھر انگت بیگواہ اِنت۔
این ڈی پی ءَ آیانی آجوئی ءِ گپ راست کرتگ ءُ گوشتگ کہ مارا باز وشی بوگ ءَ اِنت کہ مئے بنجاھی ڈپٹی آرگنائزر سلمان بلوچ گوں وتی یک دگہ سنگتےدلیپ داس ءَ ھوار آجو بوتگ ءُ پہ وشی گس ءَ سر بوتگ اَنت۔
آئی گوشتگ کہ ما آ درسیں مردم ءُ سیاسی ٹولیانی منّت ءَ گریں کہ آیاں گرانیں ساھت ءَ مئے ھمراھداری کرتگ ءُ مئے گون ءَ اوشتاتگ اَنت۔
آئی گوشتگ کہ مارا دوئیں سنگتانی آجوئی ءَ وشی بوتگ بلے ما زوربیگواھی ءِ رویشت ءَ گوں ترندی ءَ ایر جن ایں ءُ وتی آدگہ بیگواھیں سنگت، گنی بلوچ ءُ سنا کیتران بلوچ ءَ ھوار درسیں درکانودی بندیگیں بلوچانی آجوئی ءِ لوٹ ءَ کن ایں۔
