بلوچ نیشنل موومنٹ ( بی این ایم ) ءِ جارکش ءَ وتی درشان ءَ گوشتگ کہ پارٹی وتی سروک ءُ پیشگیں کارگشاد شھید ڈاکٹر منان بلوچ ءُ آئی سنگت مستونگ ءِ شھید بابو نوروز، اشرپ بلوچ، ھنیپ بلوچ ءُ ساجد بلوچ ءَ آیانی شھیدی سالروچ ءَ پہ ستک، شرپ ءُ اھد ء وپا ءَ ستک شانی ندر کنت۔
آئی ءَ گوشتگ کہ ڈاکٹر منان بلوچ ءِ زندگی ءُ شھیدی بلوچ راجی جھد ءِ ھما درپشوکیں در ءِ جھگیری ءَ کنت کہ آ پہ راجانی آجوئی، کرد، دیمونی ءُ راستی ءِ ابدمانی لیکگ بیت۔ آ تھنا یک مردمے نہ بوتگ، آ یک لیکھ، یک مادنیں کشکے اِنت ءُ جھد ءِ ھما در اِنت کہ آئی لیکھی درچ ءَ مرچی ھم بی این ایم ءَ سیاست ءُ گھگیری گوں مھکمی ءَ برجاہ داشتگ۔
جارکش ءَ گوشتگ کہ بی این ایم سدک اِنت کہ شھیدانی دیمونی زوال نہ بنت۔ ڈاکٹر منان بلوچ ءُ آئی شھیدیں سنگتانی ھون مئے راجی گوستانک ءِ ھما چراگ اَنت کہ ایردستی ءِ تھارونکیانی تہ ءَ مارا راہ پیش دار اَنت۔
آئی ءَ گوشتگ کہ ما ھمے اھد ءَ کن ایں کہ ڈاکٹر منان بلوچ ءُ آئی سنگتانی دیمونی ءِ برورد مارا آجوئی ءِ دروشم ءَ الّم رس ایت ءُ داں منزل ءَ سر بوگ ءَ آیانی ھونانی رژنائی مئے رھشونی ءَ کن اَنت۔ مئے جھد پہ وھد ءِ پژدر ءَ نہ اِنت، یک دراجکش، راھبندی ءُ لیکھی سپرے، آئی مڈی شھیدانی واب، دیمونی ءُ راجی مچی ءِ اوست اِنت۔
جارکش ءَ گوشتگ کہ اے درگت ءَ بی این ایم وتی درسیں ھنکین ءُ چپٹراں گوش ایت کہ آ شھید منان بلوچ ءُ آئی شھیدیں سنگتانی یاد ءَ پروگرام برجم بدار اَنت۔ اے پروگراماں شھیدانی سیاسی ءُ لیکھی کرد، آیانی جھد ءِ مول ءُ داں آجوئی ءَ سر بوگ ءَ بی این ایم ءِ زمہ واریاں دیم ءَ بیار اَنت۔
جارکش ءَ گڈی ءَ گوشتگ کہ پارٹی وتی درسیں کارکن ءُ گوں بلوچ راج ءَ لوٹ کنت کہ آ شھید منان بلوچ ءُ آئی پشت کپتگیں کاروان ءَ وتی مچی زمہ واری سرپد بہ بنت۔ شھیدانی ستک شانی ندر کنگ ءِ شریں وڑ ءُ ڈول ھمیش اِنت ما وتی لیکہ، پارٹی ءُ جھد ءَ گیش مھکم بہ کن ایں۔
