بلوچستان ءِ مزن وزیر سرپراز بگٹی ءَ بلوچستان ءِ بیست ءُ دومی کابینہ ءِ دیوان ءَ تران کرتگ ءُ گوشتگ کہ چہ یک پروری ءَ پد ریاست یا سرکار ءِ نیمگ ءَ چونیں ھم مردمے زور بیگواہ کنگ نہ بیت ءُ اے بابت ءَ کانودی پریم ورک بیت۔ بلوچستان ءَ پوج ءِ نیمگ ءَ چیریں ھالانی بنیاد ءَ آپریشن ءَ پہ جست ءُ پرس ءَ شکی ئیں مردم گرگ بنت، بلے چہ یک پروری ءَ پد زوریں بیگواھی ءِ جیڑہ ھلاس کنگ بیت۔
آئی گوشتگ کہ پہ ایشی گر ءُ دار ءَ بلوچستان پریوینشن آپ ڈیٹینشن اینڈ ریڈیکلائزیشن ایکٹ ( ڈبل ون ٹیٹرا ای) منگ بوتگ ءُ بلوچستان سرکار ءَ اے رولز 2025 ءَ من اتگ۔ ھمے کانود ءِ بنیاد ءَ یک جوڑ کرتگیں بنجاھے ءَ شکی ئیں مردم پولیس سروگانی چیردستی ءَ جست ءُ پرس کنگ بنت۔ دزگیر کرتگیں مردمانی کھول بیست ءُ چار ادار ءِ میان ءَ ھال دیگ بنت ءُ آیان ءَ گندُک ءِ موکل دیگ بیت۔ آیان ءَ الاج ءِ آسراتی دیگ بیت ءُ چونیں ھم مردمے چہ بنجاہ ءَ ڈن کشگ نہ بیت، چونیں ھم کانود سازیں ادارھے ءَ جست ءُ پرس کنگ بیت گڑا بنجاہ ءَ جست ءُ پرس کنت۔
بلوچ نیشنل موومنٹ ءِ انسانی ھکانی ادارہ پانک ءَ ایر جتگ ءُ گوشتگ کہ اے کانود پہ زوریں بیگواھی ءِ جیڑہ ءِ گیش ءُ گیوار کنگ ءَ جوڑ نہ بوتگ بلکیں زوریں بیگواھی ءَ یک نوکیں نامے ءِ رد ءَ کانودی بستارے دیگ ءِ جھد ءَ کنگ ءَ اَنت۔
آئی ءَ گوشتگ کہ ھمے ٹاپار جنگ بوگ ءَ اِنت چہ اے کانود ءَ زوریں بیگواھی ھلاس کنگ بوتگ، تچکیں دروگے ءُ اے گوں ھزارانی کچ ءَ بلوچ کھولاں ناانساپی یے کہ آ مرچی ھم پہ وتی آزیزانی آجوئی ءَ جھد کنگ ءَ اَنت۔ زوریں بیگواھی دروگے نہ اِنت بلکیں یک تچکیں راستی یے، ایش ھندی ءُ میان استمانی انسانی ھکانی گلاں منّ اتگ۔
پانک ءَ گوشتگ کہ ایشی گیش ءُ گیوار ھمیش اِنت کہ زوریں بیگواھی سرجم ءَ ھلاس کنگ بہ بیت، درسیں بیگواھیں مردم آمیدگس ءَ پیش کنگ بہ بنت ءُ ایشی زمہ وار کانود ءِ ھساب ءَ جست گرگ بہ بنت۔ بلوچستان ءَ دگہ بندیگجاہ درکار نہ اِنت بلکیں انساپ، راستی ءُ زور بیگواھیں مردمانی سلامتی واتری درکار اِنت۔
اے بابت ءَ پہ زور بیگواھیں مردماں جوڑ کنگ بوتگیں گل وائس پار بلوچ مسنگ پرسن ءِ چیئرمین نسر اللہ بلوچ ءِ گوشگ اِنت کہ چہ ایشی ءَ پیش ھم پہ اے وڑیں کانود ءَ ٹاپار جنگ بوتگ بلے پد ءَ کار کنگ نہ بوتگ۔ نوں ما چار ایں باریں اے سرکار چے بہ کنت۔
آئی ءَ گوشتگ کہ اد ءَ ادارہ توانمند اَنت ءُ آ اے وڑیں کانود ءَ مان نیار اَنت۔چہ ایشی ءَ پیش ھم ھما مردم کہ زور بیگواہ کنگ بوتگ اَنت آیانی آمیدگس ءَ پیش کنگ ءَ ابید لاش چگل دیگ بوتگ اَنت۔
اے بابت ءَ نامداریں وکیل ایڈوکیٹ امران بلوچ ءِ گوشگ اِنت کہ کجام ھم سیاسی کارکن یا انسانی ھکانی کارکنانی زھرشانی کنگ ریاستی ادارھاں دوست مہ بیت گڑا آ ھمے کانود ءِ رد ءَ ھمے بندیگجاہ ءَ بند کنگ بنت۔
آئی ءَ گوشتگ کہ اے درکانودی ءُ بلوچستان ءِ بنجاہ پہ سیاسی توارانی دارگ ءَ جوڑ کنگ بوتگ، اگاں نہ سند ءُ پنجاپ ءَ ھم زور بیگواھیں مردم ھست گڑا اود ءَ چی ءَ چوشیں کانود جوڑ کنگ نہ بیت۔
