بلوچ ریپبلکن پارٹی ءِ بنجاھی جارکش شیر مھمد بگٹی ءَ گوشتگ کہ گل پاکستان سرکار ءِ نیمگ ءَ نواب براھمدگ بگٹی ءُ آدگہ بلوچ سروکانی سر ءِ نھاد ءِ ایر کنگ ءَ گوں ترندیں دانکاں ایر جنت۔
آئی گوشتگ کہ اے پیسلہ ھمے گپ ءِ منانک انت کہ ریاست سیاسی ایرادگریانی اوپار کنگ ءِ جاہ ءَ ایشی پہ پالیسی ءِ رد ءَ گوں ترسینگ ءَ بے توار کنگ ءِ جھد ءَ اِنت۔
آئی گوشتگ کہ سیاسی سروکانی انام ءِ لڑ ءَ ھوار کنگ توانمندی نہ بلکیں نزوری ءُ ترس ءَ پیش دار ایت۔ اے وڑیں گامگیج بلوچستان ءَ چہ پیسر ءَ ناگیگیں جاوراں گیش گنتر کنت۔
آئی گوشتگ کہ بلوچستان اے وھد ءَ چہ انسانی ھکاں زبھر اِنت۔ زوریں بیگواھی ، ژانگولیں لاشانی دزکپگءُ درکانودی کوش دودے جوڑ بوتگ۔اے پیمیں چاگرد ءَ سیاسی سروکانی سرانی نھاد ایر کنگ ریاستی زوراکی ءِ تچک ءَ کمک کنگ ءُ ھمے گپ ءِ جار اِنت کہ ایرادگیری داروکانی بگیری ءَ زور کارمرز کنگ ءَ شر سرپد بوگ ءَ اَنت۔
آئی دیمتر ءَ گوشتگ کہ چنچو سال اِنت چہ ریاستی سروکی ءَ برجاھیں دمگاں کشندہ ٹولی ءِ کارمند سیاسی کارکن ءُ آیانی کھولاں نشانگ کنگ ءَ اَنت۔ نوں ریاست وت تچک ءَ سیاسی سروکاں نشانگ کنگ ءِ جار ءَ جنگ ءَ اِنت اے ریاستی ناشرکاری ءِ منانک اِنت۔
بلوچ ریپبلکن پارٹی جھانی ادارہ ،انسانی ھکانی گل ءُ گوں جمھوری سرکاراں لوٹ کنت کہ آ پہ ایشی گِر ءُ دار ءَ گامگیج بزور اَنت ءُ بلوچستان ءَ پہ انسانی ھکانی لگتمالیانی دارگ ءَ گامگیج بزور اَنت۔
بنشون: درشان. اکس: دامگ
