بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی درشان ءَ گوشتگ کہ بی ایل ایپ ءِ سرمچاراں 14 جنوری ءِ بیگاہ ءِ چار ءَ آواران ءِ ھند پیراندر گلام مھمد بازار ءِ نزیک ءَ پوج ءِ کاروان ءَ ھواریں یک پیکپ گاڑی یے گوں بمب ءَ نشانگ کرتگ۔ ارش ءِ آسر ءَ گاڑی ءَ سواریں دوازدہ کارمند جاھی مرتگ ءُ گاڑی سرجم ءَ تباہ بوتگ۔ آئی تامربند ھم جوڑ کنگ بوتگ کہ آ زوت چہ بی ایل ایپ ءِ رسانکدری چینل آشوب ءَ شنگ کنگ بیت۔
آئی ءَ گوشتگ کہ ھمے روچ ءَ دگہ یک کاروائی یے ءَ بی ایل ایپ ءِ سرمچاراں تمپ ءِ ھند نزر آباد ءَ نیمروچ ءِ دوازدہ ءَ زورگریں پوج ءِ کارمند ھما وھد ءَ نشانگ کرتگ اَنت کہ آیاں جتائیں راہ چیر اندری بستگ اَنت۔ سرمچاراں یک شوربندی یے ءِ پارست ءَ کاروائی کرتگ، ایشی آسر ءَ چار کارمند مرتگ ءُ دو ٹپی بوتگ۔ میڑ ءِ میان ءَ پہ پوج ءَ زوت جھلی ءُ برزی کمک دیم دیگ بوتگ ءُ ڈرون ھم بال دیگ بوتگ۔ سرمچار چہ سوبمندیں کاروائی ءَ پد پہ سلامتی درکپتگ اَنت۔
جارکش ءَ گوشتگ کہ دگہ یک کاروائی یے ءَ بی ایل ایپ ءِ سرمچاراں چاردہ جنوری ءَ کوسٹل ھائی وے اورماڑہ ءُ پسنی ءِ میانی ھند کواری ءَ بستگ ءُ گاڑی پٹ ءُ پول کرتگ اَنت۔ ھمے میان ءَ نزیکیں پولیس چوکی ءِ سر ءَ ارش کرتگ ءُ پولیس چوکی دستیگ کرتگ ءُ اود ءَ ایریں سلاہ زرتگ اَنت۔
آئی ءَ گوشتگ کہ ارش ءِ میان ءَ پہ کمک ءَ آیوکیں ایپ سی ءِ کاروان ءِ سر ءَ سنگر گپتگ ءُ گوں ایل ایم جی ءُ راکٹاں ارش کرتگ۔ اے کاروائی ءِ میان ءَ کاروان ءَ ھواریں یک گاڑی یے چہ راکٹ ءِ لگگ ءَ چپی بوتگ، ایشی آسر ءَ گاڑی باز تاوان بوتگ ءُ گاڑی ءَ سواریں شش کارمند مرتگ۔ رند ءَ ایپ سی ءَ سرمچارانی رندگیری کنگ ءِ جھد کرتگ، ھمے رندگیری کنگ ءِ میان ءَ بیتگیں میڑ ءَ دگہ دو کارمند مرتگ ءُ باز ٹپی بوتگ۔ اے کاروائی ءِ میان ءَ چہ پولیس چوکی ءَ سے سی تیری ءُ دگہ سامان دستیگ کرتگ۔
جارکش ءَ گوشتگ کہ ھمے روچ ءَ دگہ یک کاروائی یے ءَ چاردہ جنوری ءِ بیگاہ ءِ پنچ ءَ بی ایل ایپ ءِ سرمچاراں مشکے، ملشبند ءَ پاکستانی پوج ءِ چوکی ءِ سر ءَ گوں مزنیں سلاھاں ارش کرتگ۔ ایشی آسر ءَ دژمنیں پوج ءَ جانی تاوان بوتگ۔
میجر گھرام بلوچ ءَ درشان ءِ گڈی ءَ کاروائیانی زمہ واری من اِتگ ءُ گوشتگ کہ ھمے کول ءَ کن ایں کہ داں بلوچستان ءِ آجوئی ءَ زورگریں پاکستانی پوج ءِ بگیری ءَ مئے کاروائیانی درچ برجاہ بیت۔
