اسلام آباد ءَ بلوچ یجھتی کمیٹی ءِ سروک ءُزور بیگواھیں مردمانی کھولانی نیمگ ءَ برجاھیں زھرشانی نندانک ءَ آیاں پریس کانپرنس کرتگ ءُ پاکستان ءِ تھی کارانی وزیر تلال چودھری ءِ گپ رد کرتگ اَنت ءُ گوشتگ کہ ما اے بھتاماں سیاسی درشان سرپد نہ بہ ایں بلکیں اے کینگداری ءَ پیش دار ایت کہ ریاست ءِ نیمگ ءَ بلوچ راج ء گون ءَ برجاہ اِنت، ھما کینگ کہ یک بادشاھے وتی ایردست ءِ گون ءَ بدار ایت۔
آیاں گوشتگ کہ اگاں ریاست ءِ آمیدگس ءَ واک بوت ایں گڑا ما اے بھتامانی بگیری ءَ کانودءِ رد ءَ منانک لوٹ اتگ اَت کہ مئے پشت ءَ کئی دست ھوار اِنت۔ دومی گپ ایش اِنت کہ ما آیاں جُست کنگ لوٹ ایں کہ اگاں مئے لوٹانی پیلو کنگ ءِ واک شمئے دست ءَ نہ اِنت گڑا مارا بہ گوش اِت ما وتی لوٹاں کج ءَ پیش بہ کن ایں۔
آیاں گوشتگ کہ راستی ھمیش اِنت تلال چودھری ءَ وت ءَ واک نیست کہ وتی داراھاں ھم جست کرت نہ کنت۔یا نادرس اِنت یا ھمے زوراکیاں ھوار اِنت۔ ھمے سوب اِنت کہ آئی ءَ گپ ءُ تران ءِ در بند کرتگ ءُ مئے سر ءَ دروگیں بھتام جنگ ءَ اِنت۔
آیاں گوشتگ کہ ما تھنا ھمے راستی ءَ چہ آئی ءَ اش کنگ لوٹ ایں کہ بہ گوش ایت چیریں ادارھانی دیم ءَ نادرس اِنت۔ما چہ بلوچستان ءَ سدانی کچ ءَ میل دور اتکگ ایں کہ پنجاہ ءُ چار روچ اِنت ما نندانک ءَ نشتگ ایںءُ مرچی ھم ریاست ءِ بھتامانی نشانگ بوگ ءَ ایں اے پہ ریاستی ادارھاں شرم ءِ گپے۔ اے پہ آیانی پیشانی سیاھیں ٹکے کہ وت ءَ راجمستریءِ منوگر گوش اَنت۔ بلے نہ مارا انساپ دات کن اَنت ءُ نہ مئے گپاں گوش دار اَنت۔ تھنا رسانکدر ءَ وت ءَ شر پیش دار اَنت ءُ دومی ءَ بھتام جن اَنت۔
آیاں گوشتگ کہ ما گوں پر ایمنی ءَ وتی زندگی، پجار ءُ پہ انساپ ءَ جھد ءَ برجاہ دارایں، اے زھرشانی ھمنچو دراجکش بیت ادارہ ھمنچو ملامت بنت۔
