بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بلوچ جنینانی زوریں بیگواھیانی یکشل ءَ گیش بوگ ھمے چیز ءَ پیش دار ایت کہ پاکستانی پوج بلوچ چکچینی ءِ پالیسی ءَ یکشل ءَ ترند کنگ ءَ اَنت۔
آئی ءِ گوشگ اِنت کہ بلوچ جنینانی زوریں بیگواھی یک دودے جوڑ بوگ ءَ اِنت، ایشی سوب ءَ بلوچ جنین ترس ءِ دیمپان بوگ ءَ اَنت۔ چہ ایشی نہ تھنا کھول بلکیں سرجمیں بلوچ چاگرد ءِ سر ءَ سان دور دیگ ءَ اَنت۔
آئی ءَ گوشتگ کہ گوستگیں لھتیں ماھانی میان ءَ باز بلوچ جنین زور بیگواہ کنگ بوتگ کہ اے پالیسی ءِ گیش بوگ ءَ پیش دار ایت۔ یونیورسٹی ءِ نودربر ماہ جبین چہ مئی 2025 ءَ زور بیگواہ کنگ بوتگ، چہ ایشی ءَ پد پانزدہ سالیگیں نسرینہ بلوچ 22 جون 2025 ءَ چہ ھب چوکی ءَ بیگواہ کنگ بوتگ۔
بی وائی سی ءِ رد ءَ ھمے درچ ءَ یک دسمبر 2025 ءَ پرزانہ زھری چہ ھزدار نادراھجاہ ءَ مردمانی دیم ءَ زور بیگواہ کنگ بوتگ۔ چہ ایشی ءَ پد دالبندین ءِ جاہ منند رھیم بلوچ 9 دسمبر 2025 ءَ زور بیگواہ کنگ بوتگ۔ انوگیں روچاں 18 دسمبر 2025 ءَ سنا اللہ ءِ لوگبانک ھزرہ بلوچ چہ ھب ءَ زور بیگواہ کنگ بوتگ۔ اے ویل ھمے راستی ءَ پیش دار ایت کہ بلوچ جنینانی جان، شرپ ءُ سلامتی ھم پھریز نہ اِنت۔ ھمے وڑ ءَ 20 دسمبر 2025 ءَ ھانی دلوش ءُ ھیر النسا چہ ھب چوکی ءَ زور بیگواہ کنگ بوتگ اَنت۔
آئی ءَ جار جتگ ءُ گوشتگ کہ بلوچ جنینانی زوریں بیگواھی ءِ بگیری ءَ 22 دسمبر ءَ پنچ روچی سرپدی مھم ءُ زھرشانی مھم بندات کن ایں۔
بی وائی سی ءَ گوشتگ کہ اے مھم ءِ میان ءَ آن لائن پٹیشن، درشان، تامربندی کلوہ، شائری ءُ ساچشت، پوسٹر ءُ ڈیجیٹل مواد، چیدگی زھرشانیءُ ٹویٹر اسپیس ءِ رد ءَ ھندی ءُ میان استمانی تک ءَ توار چست کن ایں۔
آئی ءَ گڈی ءَ گوشتگ کہ مھم ءِ مول بلوچ جنینانی زوریں بیگواھی ءِ بگیری ءَ میان استمانی انسانی ھکانی گلاں سرپد کنگ اِنت ءُ میان استمانی تک ءِ انسانی ھکانی لگتمالی ءِ نیمگ ءَ دلگوش دیگ اِنت ءُ پاکستانی پوج ءِ نیمگ ءَ ناشریں میارباریانی جھان ءِ دیم ءَ پاشک کنگ اِنت۔
