گْوادر: زوربیگواھیں ازیم دوست ءِ گھار رکسانہ دوست ءَ وتی شنگ کرتگیں درشانے ءَ گوشتگ کہ منی برات ازیم دوست پاکستانی پوج ءَ سَے جولائی 2015 ءَ چہ گْوادر درکانودی آوار جتگ ءُ بیگواہ کرتگ کہ انگت آئی ھچ ھال نیست۔
آئی گوشتگ کہ گوستگیں دہ سال اِنت مئے کھول سسائی جنجالانی دیمپان اِنت۔ منی مات ھمک روچ پہ وتی زھگ ءِ ودار ءَ ارس گوارینگ ءَ اِنت۔ مئے زند پہ جنجالی گوزگ ءَ اِنت۔ وشی، واب ءُ امیت درس ھلاس بوتگ اَنت۔
آئی گوشتگ کہ زوربیگواھی جھانی کانود انسانی ھکانی رد ءَ انسانیت ءِ بگیری ءَ ٹوھیں میارے۔ اکوام متھدہ ءِ راھبند ءِ رد ءَ اے یک مچی سزایے کہ تھنا یک مردمے ءِ ناں بلکیں سرجمیں کھول ءَ تباہ کنت۔ ما گوستگیں مزنیں مدتے بیت کہ ھمے مچی سزا ءِ آماچ ایں۔ یک بے میاریں انسانے ءِ زوربیگواہ کنگ ءُ آئی کھول ءِ آزار دیگ نہ انساپ اِنت ءُ نہ انسانیت اِنت۔ اے وڑیں زوراکی کس نہ من ایت۔
رکسانہ دوست ءَ گوشتگ کہ آ ریاست کہ وت ءَ اسلامی جمھوریت گُوش ایت نہ اسلام ءِ رد ءَ اوشتگ ءَ گندگ بیت ءُ نہ کہ آئی ءَ جمھوریت ھست۔
آئی گوشتگ کہ مرچی ھم ازیم دوست ءِ وڑیں باز ورنا ریاست ءِ آزار جاھاں وتی نہ کرتگیں میارانی سزا ءَ ورگ ءَ اَنت۔ آیانی کھولاں اے ھم سرپدی نہ اَنت کہ آ زندگ اَنت یا کشگ بوتگ اَنت۔
آئی گوشتگ آمیدگس کہ انساپ ءِ گڈی اوست زانت بیت بلے بد بھتی ءَ آ ھم بے توار اِنت۔ ھمک روچ زوربیگواھیں مردمانی کھول دگانی سر ءَ زھرشانی کن اَنت بلے یک ججے ءَ ھم اے توکل نیست کہ آ دلگوش ءَ گور بہ کنت ءُ انسانی ھکانی لگتمالی ءِ بابت ءَ توار چست بہ کنت۔
رکسانہ دوست ءَ گوشتگ کہ من یک لاچاریں گھارے ءِ بستار ءَ گوں جھانی انسانی ھکانی گلاں لوٹ کن آں کہ منی برات ازیم دوست ءَ ھوار پہ درسیں زوربیگواھیں مردمانی آجوئی ءَ زوت گامگیج بہ زور اَنت۔
