بلوچ یکجھتی کمیٹی (بی وائی سی) ءَ وتی شنگ کرتگیں درشانے ءَ گوشتگ کہ پروپیسر شپیک زھری چہ 2018 ءَ زوربیگواھیں راشدھسین ءِ براتءُ بی وائی سی ءِ باسک ماہ زیب بلوچ ءِ پت اِنت۔ بدہ دسمبر ءِ نیمروچ ءَ چہ ھب چوکی ءَ سنٹر ءَ آوار جنگءُ بیگواہ کنگ بوتگ۔
آئی گوشتگ کہ شپیک زھری، زھری کالج ءَ پولیٹیکل سائنس ءِ پروپیسرے ءُ چہ ایشی ءَ پیسر 2013 ءَ ھم زوربیگواہ کنگ بوتگ اَت ، اے ھمے گپ ءَ پدّر کنت کہ آ چہ دراجکشیں وھدے ریاستی زوراکیانی آماچ اِنت۔
بی وائی سی ءَ گوشتگ کہ اے ویل یک مردمے ءِ نہ بلکیں ھمے گپ ءِ درچ اِنت کہ ریاست ماہ زیب بلوچ ءُ آئی سرجمیں کھول ءَ مچی سزا دیگ ءَ اِنت۔ پہ کھول ءِ یک مردمے ءَ انسانی ھکاں توار چست کنگ ءِ پژدر ءَ آدگہ مردم آوار جنگ، ترسینگ ءُ زوربیگواہ کنگ بوگ ءَ اَنت دانکہ سرجمیں کھول ترسینگ ءُ بے توار بے بہ بنت۔
آئی گوشتگ کہ اے رویشت نہ تھنا بنکی انسانی ھکانی لگتمالی اِنت بلکیں مچی سزا ءِ درچ اِنت کہ چہ ایشی ءَ یک مردمے ءِ سیاسی ءُ چاگردی سرگرمیانی جاہ ءَ سرجمیں کھول سزا دیگ بیت۔ پروپیسر شپیک زھری ءِ زوریں بیگواھی چوناھا آئی کھول انسانی ھکانی درگت ءَ جھد ءُ آیانی توار ءِ دارگ ءِ یک جھدے اِنت۔ دانکہ آئی کھول وتی بیگواھیں آزیزانی آجوئی ءُ زوربیگواھیانی بگیری ءَ چہ جھد ءَ دزکش بوگ ءَ لاچار بہ بنت۔
بی وائی سی ءَ گوشتگ کہ ریاستی ادارھانی نیمگ ءَ اے وڑیں پندل اے گپ ءَ پدّر کنت کہ پرایمنیں جھد ءُ پہ انسانی ھکاں توار چست کنوک مچی سزا دیگ بوگ ءَ اَنت کہ چونیں ھم جمھوری چاگردے ءَ منّگ نہ بیت۔
