چہ شال ءَ یازدہ دسمبر ءِ شپ ءَ پاکستانی چیریں ادارھانی دست ءَ زور بیگواھیں ڈاکٹر راشد الی ءِ برات وش داد بلوچ ءَ وتی شنگ کرتگیں درشانے ءَ گوشتگ کہ شش روچ ءِ گوزگ ءَ ابید منی برات ءِ ھچ ھال نیست کہ چون ءُ کج ءَ اِنت۔
آئی ءَ گوشتگ کہ منی برات یک زمہ واریں کانود ءِ پابندیں شھری یے، آ شپ ءُ روچ ریاستی ادارھانی دیم ءَ نادراھجاہ ءَ شتگ ءُ آتکگ، آئی مردمانی الاج کرتگ ءُ جان پھریزگ اتگ اَنت۔ چہ برات ءِ زوریں بیگواھی ءَ پد مئے مات سسائی نادراہ اِنت ءُ یکشل ءَ گریوگ ءَ اِنت، بلکیں مئے سرجمیں کھول سسائی جنجالانی آماچ اِنت۔
وش داد بلوچ ءَ گوشتگ کہ منی برات گوں ھچ وڑیں سیاسی چست ءُ ایراں گوں نہ بوتگ۔ راشد الی ریاست ءِ بگیری ءَ داں وٹسپ ءَ ھم اسٹیٹسے ایر نہ کرتگ۔ گڑا آئی گون ءَ چے ءَ زوراکی کنگ بوگ ءَ اِنت ءُ ابید ءِ میار ءَ مئے سرجمیں کھول چے ءَ سزا دیگ بوگ ءَ اِنت۔
آئی ءَ گوشتگ کہ منی برات ءِ سر ءَ چونیں ھم بھتامے ھست گڑا کانود ءِ رد ءَ آمیدگس ءَ پیش کنگ بہ بیت۔ اگاں بے میار اِنت گڑا زوت یل کنگ بہ بیت۔ ما پہ وتی برات ءِ آجوئی ءُ انساپ ءَ لوٹ ایں۔
