نیشنل ڈیموکریٹک پارٹی ءَ وتی شنگ کرتگیں درشانے ءَ گوشتگ کہ 16 ستمبر ءَ شال پریس کلب ءِ دیم ءَ پہ بیگواھیں سگیر اھمد ءُ اکرار بلوچ ءِ آجوئی ءَ کھول ءِ نیمگ ءَ زھرشانی روانکے کشگ بوگ ءَ اِنت ما اے زھرشانی ءِ پلہ مرزی ءَ کن ایں۔ پرچا کہ ما سرپد بہ ایں کہ یک مردمے ءِ درکانودی آوار جنگ ءُ بیگواہ کنگ آ مردم ءِ ھک ءُ راھبند ءِ لگتمالی اِنت کہ ایشی ءَ ھچ پیم ءَ نہ من ایں۔
آئیءَ گوشتگ چوش کہ 11 جون 2025 ءَ سگیر اھمد ءُ آئی ناکو زتک اکرار بلوچ ءَ بیلہ ءَ روگ ءِ میان ءَِ چہ اورماڑہ ءَ ریاستی ادارھاں بے ارزیءَ آوار جتگءُ داں سے ماہ ءِ سرجم بوگ ءَ آ دیمءَ آرگ نہ بیتگ اَنت۔ بلوچستان ءَ زوریں بیگواھیانی نوکیں درچے برجاہ اِنت کہ ایشی گیش ءُ گیوار درسیں ریاستی ادارھانی جست گرگ اِنت کہ آ بلوچانی زوریں بیگواھی ءَ دیم ءَ گندگ بنت۔
آئی گوشتگ کہ ما یکبرے پد ءَ ریاستی ادارھاں کڈن کن ایں کہ آ بلوچستان ءَ وتی زوراکی ءِ پالیسی ءَ بند بہ کن اَنت ءُ اود ءِ جھمنندیں مردماں آیانی بنکی ھک دیگ بہ بیت۔ ما سگیر بلوچ ءُ اکرار بلوچ ءَ ھوار درسیں بیگواھیں بلوچانی آجوئی ءِ لوٹ ءَ کن ایں ءُ شال ءِ جھمنندیں درسیں بھرگاں سیادی داروکیں مردمانی گون ءَ لوٹ کن ایں کہ آ 16 ستمبر ءِ بیگاہ ءِ ادار چار ءَ شال پریس کلب ءِ دیم ءَ بیوکیں زھرشانی ءَ بھر بہ زور اَنت ءُ وتی کرد ءَ پیلو بہ کن اَنت۔
