شال: بلوچ یکجھتی کمیٹی ءِ سروکاں شال پریس کلب ءَ پریس کانپریس کرتگ ءُ گوشتگ کہ بلوچ یکجھتی کمیٹی ءِ سروک ڈاکٹر ماہ رنگ بلوچ 22 مارچ ءَ چہ سریاب دگ شال ءَ ھما وھد ءَ دزگیر کنگ بیتگ کہ آ چہ پاکستانی لشکر ءِ تیرگواری ءَ دو ورنا ءِ شھید بوگ ءِ بگیری ءَ برجاھیں زھرشانی ءَ ھوار بیتگ۔ پولیس ءَ زوراکی کرتگ ءُ نہ تیوک ءَ لاش ءُ آیانی کھول دزگیر کرتگ اَنت بلکیں ڈاکٹر ماہ رنگ بلوچ ، بیبو بلوچ ءُ آدگہ جنین ھم دزگیر کرتگ اَنت۔
آئی ءَ گوشتگ کہ بندات ءَ دزگیر کنگ ءِ سوب گوشگ نہ بیتگ، دومی روچ ءَ انتزامیہ ءَ رسانکدر ءَ گوشتگ کہ سیکشن 3 ایم پی او ءِ پارست ءَ دزگیر کرتگ اَنت۔ ایم پی او ایکٹ 2011 ءِ رد ءَ دلگوش، بھتام ءُ دیمپانی ءِ ھک ءَ کانود دنت، اے کیس سرجم ءَ مان آرگ نہ بیتگ۔
آئی ءَ گوشتگ کہ ما بلوچستان ءِ مزن آمیدگس ءَ شتگ این ءُ کانود ءِ درسیں تک چار اتگ اَنت۔ ھمے اوست بیتگ کہ راھبند ءُ کانود ءِ رد ءَ پیسلہ کنگ بیت۔ بلے گوں بژن ءَ گوشگ کپ ایت کہ آمیدگس چہ وتی راھبندی زمہ واریاں نادزرس بیتگ ءُ آئی ءَ کیس ھوم ڈیپارٹمنٹ ءَ دیم داتگ۔
آئی ءَ گوشتگ کہ اگاں آمیدگس مئے بگیری ءَ پیسلہ بہ کنت گڑا مارا آ مزن آمیدگس ءَ روگ ءِ ھک ھست بلے ھمے انتزامیہ ءِ دست ءَ دیگ ءِ راہ انوں بند کنگ بیتگ۔ ھوم ڈیپارٹمنٹ ءِ جوڑ کرتگیں بیوروکریٹک کمیٹی ءِ پیسلہ ءَ وھد دیگ نہ بیتگ اے انساپ نہ دیگ زانگ بیت۔
آئی ءَ گوشتگ کہ ما آمیدگس، وکیل ءُ انسانی ھکانی ادارھانی گون ءَ لوٹ کن ایں کہ پہ اے جیڑہ ءَ وتی کرد ءَ پیلو بہ کن اَنت ءُ پہ انساپ دیگ ءَ سدکی بہ دے اَنت۔ بی وایی سی زوت وتی آھوکیں گامگیج ءِ جار ءَ جنت۔
