بلوچستان لبریشن پرنٹ ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ ھپت ستمبر ءِ بیگاہ ءَ بی ایل ایپ ءِ چیریں بھرگ ءَ ھال داتگ کہ تربت ءِ ھند سنگانی سر ءَ منیر مبارکی ءِ گس ءَ زورگریں پاکستانی پوج ءِ چیریں بھرگ ایم آئی ءِ کارمندانی دیوانے بوگ ءَ اِنت۔ ھمے ھال ءِ پژدر ءَ سرمچاراں بیگاہ ءِ ادار 4:40 ءَ منیر مبارکی ءِ گس ءَ اُرش کرتگ۔ سرمچارانی سر بوگ ءَ لھتیں دمان پیش دیوان ھلاس بوتگ ءُ ایم آئی ءِ لھتیں کارمند گاڑی ءِ سر ءَ درکپگ ءَ سوبین بوتگ اَنت۔ بلے سرمچاراں کاروائی کرتگ ءُ ایم آئی ءِ کارمند مستی ھان ء منیر مبارکی ءُ مسیب ء ھاسل تیرگواری کرتگ ءُ کشتگ ءُ آیانی گاڑی مانداشتگ اَنت۔
آئی گوشتگ کہ ایم آئی ءِ اے کارمند تُربَت شھر ءَ بے میاریں بلوچ گیشتر ورنایانی نشان کنگ، زوریں بیگواھی ءُ رسانکدر ءَ کارکنوکیں ورنایانی گس ءِ مردماں بیھار دیگ ءُ ترسینگ ءَ ھوار بوتگ اَنت۔ ایشی ءَ ابید آیانی بگیری ءَ تُربَت شھر ءَ دزی ءِ وڑیں میاراں ھوار بوگ ءِ راستیں منانک گل ءِ کر ءَ ھست اِنت۔ ایشانی بنیاد ءَ آ نشانگ کنگ ءُ کشگ بوتگ اَنت۔
جارکش ءَ گوشتگ کہ یک دگہ کاروائی یے ءَ ھپت ستمبر ءَ شپ ءِ ادار یازدہ ءُ دوازدہ ءِ میان ءَ بی ایل ایپ ءِ سرمچاراں سوراب ءَ سی پیک دگ بائی پاس ءَ چہ بلوچستان ءَ پنجاپ ءَ گیس بروکیں دو بوزر گاڑی نشانگ کرتگ۔ چہ ایشی آسر ءَ دوئیں گاڑیاں کمیں تاوان بوتگ اَنت۔ سرمچاراں دوئیں گاڑیانی ڈرائیور دزگیر کرتگ ءُ گوں وت برتگ اَنت۔
میجر گھرام ءَ سنگانی سر تربت ءَ ایم آئی ءِ دو کارمندانی کوش ءُ سوراب ءَ گیس بروکیں بوزر گاڑیانی نشانگ کنگ ءِ زمہ واری من اِتگ۔
