بلوچ یکجھتی کمیٹی ءَ وتی شنگ کرتگیں درشانے ءَ گوشتگ کہ بی وائی سی شال ءَ مچی ءَ شھید بیتگیں پانزدہ ورنا ءُ چہ ھپتاد ءَ گیش ٹپی بیتگیں مردمانی کھولانی گون ءَ ھمدردی درشان کنت ءُ سکا بژنیگ ایں۔
آئی ءَ گوشتگ کہ اے ویل تھنا پھازداری ءِ بے سوبی یا بے سمائی ءِ آسر نہ اِنت بلکیں بلوچ چکچینی ءِ درچ ءِ یک بھرے۔ ریاست بلوچستان ءَ پہ بگیریانی دارگ ءَ کودکانی کوش ءَ چک ءُ پد نہ بیت۔ لھتیں ماہ پیش نندانک ءَ بیتگیں وتکش تراک ءَ ھچ وڑیں رپورٹ دیمءَ نہ یتکگ، اے ھمے چیز ءَ پیش دار ایت کہ اے درس یکیں پالیسیءِبھر اَنت۔مرچی پد ءَ یک مچی یے نشانگ کنگ بیتگ ءُ درزنانی کچ ءَ گسانی چراگ کشتگ اَنت۔
آئی ءَ گوشتگ کہ ریاست ءَ گوستگیں چنچو ماہ اِنت کہ بلوچستان ءَ بلوچ سیاسی ٹولیانی بگیری ءَ گنتریں زوراکی کرتگ۔ سیاسی مچی ءُ چکچینی ءِ بگیری ءَ چست بیتگیں توار پہ زور دارگ بوگ ءَ اَنت۔ زی شال ءَ بی این پی ءِ مچی ءِسر ءَ بیتگیں وتکش ارش ھمے پالیسی ءِ درچ اِنت ءُ ھمے راستی ءَ پاشک کنت کہ بلوچ اگاں پارلیمنٹ ءِ بھر بہ بیت یا چہ پارلیمنٹ ءَ ڈن جھد بہ کنت آیانی سیاسی توار اوپار کنگ نہ بیت ءُ پہ آیانی ھلاس کنگ ءَ ھمے وڑ ءَ زور گوں ترندی ءَ کارمرز کنگ بیت۔ ریاست بلوچ ءِ ھستمان ءَ ھلاس کنگ لوٹ ایت۔ گھتر ھمیش اِنت کہ بلوچ اے شونداتءَ بہ زان اَنت ءُ بلوچ چکچینی ءِ بگیری ءَ گھگیری ءَ بھر بزور اَنت ءُوتی ھستمان ءَ بہ پھریز اَنت۔
