کراچی: په زوربیگواھی مردمانی پد جنگ ءَ کراچی پریس کلب ءِ دیم ءَ کھولانی زھرشانی گدان ءَ مرچی 29 روچ سرجم بیتگ ، موسم ءِ گرمی ءُ آدگه جنجالاں ابید ھم زوربیگواھیں ورناھانی کھول زھرشانی ءَ نشتگ اَنت۔
زھرشانی ءِ میان ءَ زوربیگواھیں ورنا زاھد بلوچ ءِ پت ھمید بلوچ ءَ گوں رسانکدر ءَ تران کرتگ ءُ گوشتگ که ما گوستگیں روچاں ماری پور ءَ تھنا ھمے اَمیت ءَ وتی زهرشانی ھلاس کرتگ که اود ءَ مارا چه سرکار ءِ نیمگ ءَ بیگواھیں مردمانی یل کنگ ءِ بابت ءَ دلجمی دیگ بیتگ ، اے بابت ءَ ماری پور ءِ پولیس اسٹیشن ءَ گوں سرکاری سروگاناں ھم گند ءُ نند کرتگ بلے چه ایشی ءَ ابید مئے مردم انگت یل کنگ نه بیتگ اَنت ، آیانی اے گپ ءَ کھولانی درد گیش کرتگ اَنت۔
آئی ءَ گوشتگ که منی زھگ کانودی کاروائی یا آمیدگس ءِ پرمان ءَ ابید بیگواه کنگ بیتگ ، اگاں آئی ءِ سر ءَ بھتامے ھست گڑا گوں منانک ءَ آمیدگس ءَ پیش کنگ به بیت ، اے وڑءَ بیگواه کنگ کانود ءُ رھبندانی تچک ءَ بگیری اِنت ، زاهد بلوچ ءَ کراچی زانشجاه ءَ اینٹرنشل ریکیشنز ڈیپارٹمنٹ ءَ وتی وانگ آسر کرتگ ءُ چه کار ءِ نه بوگ ءِ سوب ءَ آئی ءَ په کھول ءِ والینگ ءَ رکشا ءِ ڈرائیوری کرتگ ، بلے چه ایشی ءَ ابید ھم بیگواه کنگ بیتگ۔ من ءَ وت جگر ءِ نادراھے آں ءُ تنگدست ءُ نزوریں مردمے آں ، اے جاوراں زھگ ءِ بیگواھی ءَ مئے سرجمیں کھول تباه کرتگ۔
آئی ءَ گڈی ءَ زوربیگواهیں مردمانی یل کنگ ءِ لوٹ کرتگ ءُ گوشتگ که دانکه مئے زھگ آمیدگس ءَ پیش کنگ نه بنت ، مئے زھرشانی دیمتر ءَ گیش کنگ بیت۔
