اسلام آباد ءَ پہ بلوچ یکجھتی کمیٹی ءِ سروکانی ناھکیں بندیگ کنگ ءُ زوریں بیگواھیانی بگیری ءَ برجاھیں زھرشانی نندانک ءَ چل ءُ شش روچ سرجم بیتگ کہ انگت ءَ برجاہ اِنت۔ اے وھد ءَ زور بیگواھیں مرمانی کھولاں ھوار بی وائی سی ءِ سروکانی کھول ھم زھرشانی نندانک ءَ نشتگ اَنت۔
گوں سانمندیں کھولا پہ ھمدردری درشان کنگ ءَ انسانی ھکانی کارکن، اھوالکار ءُ جتا جتائیں مردم پیداک اَنت۔
چوش کہ مرچی 30 اگست اِنت کہ اے روچ زوریں بیگواھیانی میان استمانی روچ زانگ بیت کہ اے روچ ءَ سرجمیں جھان ءِ انسانی ھکانی گل اے روچ ءَ زھرشانی کن اَنت یا دیوان برجم دار اَنت۔
اے روچ ءِ بابت ءَ چہ زھرشانی نندانک ءَ بی وائی سی ءِ بنجاھی سروک ڈاکٹر ماہ رنگ ءِ گھار نادیہ بلوچ ءِ گوشگ اِنت کہ جھان تھنا ھمے روچ ءَ پہ زوریں بیگوھیانی بگیری ءَ دار ایت ءُ پہ وتی مردماں انساپ ءِ لوٹ ءَ کنت، بلے بلوچستان ءَ ھمک روچ زوریں بیگواھیانی بگیری ءَ زھرشانی کنگ بوگ ءَ اِنت۔
آئی ءَ گوشتگ کہ ما را چل روچ ءَ گیش اِنت کہ ما اد ءَ زھرشانی ءَ نشتگ ایں چہ مئے لوٹاں یکے ھمے زوریں بیگواھی ءِ جیڑہ اِنت ، بلے انچو روچ ءَ پد ھم مئے گپ گوش دارگ نہ بیت گڑا پاکستان جھان ءِ وڑ ءَ کجام دیم ءَ اے روچ ءَ دار ایت۔
